Qırım Yuqarı mahkemesi «Çiygoznıñ işi» boyunca toplaşuvda yarımadadan rusiyeli senatorlar Olga Kovitidi ve Sergey Tsekovnıñ sorğuğa çekilmesi aqqında imaye tarafınıñ şefaat arizasını qanaatlendirdi.
Bu aqta adliyeci Nikolay Polozov video muracaatında bildirdi, videonı qırımtatar faali Zair Smedlâyev Facebook saifesinde toplaşuvdan soñ paylaştı.
«Mahkeme ilân etti ki, mahkemege Kovitidi ve Tsekovdan telefonogrammalar keldi, olar, kelip izaat bermege niyetlengenlerini bir daa qayd eteler. Bundan sebep, imaye tarafı qayd etilgen şahıslarnıñ davet etilmesi aqqında bir daa şefaat arizalarını berdi, ve mahkeme bunı qanaatlendirdi», – dep añlattı Polozov.
Adliyeciniñ sözlerine köre, sorğu keçirilecek tarih daa belgilenmedi, amma «ihtimal, bu kelecek afta keçirilecektir».
Bunen beraber, mahkeme Qırım parlamenti spikeri Vladimir Konstantinovnıñ sorğuğa çekilmesi aqqında imaye tarafınıñ şefaat arizasını kene de red etti.
Avdetniñ evel bildirgenine köre, Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
