Qırımda «Hizb ut-Tahrir» işi boyunca yaqalanğan qırımtatar kartserge keçirildi

14.06.201711:45

Qırımda Qırımda «Hizb ut-Tahrir» işi boyunca Yaltada yaqalanğan Arsen Cepparov 25 künge kartserge keçirildi.

Bu aqta QirimInfo saytı, adliyeci Cemil Temişevniñ sözlerine esaslanıp, bildire.

Adliyeciniñ sözlerine köre, Cepparov kamera qapısını açmaq SİZO idaresiniñ talabını red etkeni içün kartserge qapatıldı.

«Olarnıñ kamerası SİZO-da eñ kiçik soylarından biri ola. O yerde keçmek bile imkân yoq. Bir adam tursa, ekinci keçip olamaz. Bunıñ içün kameranıñ qapısı yaramay açıla edi», – dep añlattı adliyeci.

Temişevniñ sözlerine köre, Cepparov endi dört kün kartserde buluna, onıñ alı birden yaramaylaştı, o, daima ağrını yoq etken ilâclarnı içmek mecbur.

«O, bu yerge oturtılğanda tedeviylenüvden keçe edi… Onı çorap ve maykanen andan ketirdiler. Bütün geceni o, dımlı kartserde turıp keçirdi», – dep ayttı Temişev.

Avdetniñ bildirgenine köre, bundan evel Cemil Temişev Arsen Cepparovnıñ Aqmescit SİZO-sı tibbiy hadimleri tarafından baqılmasını talap etip, bunı yaptırdı. Arsenniñ bedeninde daima şişikler peyda ola. Adliyeciniñ sözlerine köre, tedaviylenüvden keçken soñ Cepparov özüne kelip başladı.

«Hizb ut-Tahrir» işi boyunca Yaltadaki Qızıltaş (Krasnokamenka) köyünde yaqalanğan Arsen Cepparov ve Refat Alimov apiste 2016 senesi aprel 18-den başlap buluna.

Rusiye Yuqarı mahkemesi «Hizb ut-Tahrir» teşkilâtını yasaq etti ve «terroristik» tanılğan 15 birleşme cedveline kirsetti.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası