Ahtem Çiygoznıñ ağır hasta anası oğlunı körmege arzu ete

16.06.201719:50

2014 senesi fevral 26-da kütleviy nizamsızlıqnı teşkil etüvnen qabaatlanıp eki yıldan ziyade SİZO-da bulunğan qırımtatar faali Ahtem Çiygoznıñ anası hasta olıp, şimdiki vaqıtta ağır alda buluna. Onıñ yekâne arzusı, oğlunı körmektir.

«Bir közçigimnen olsa da, körmege isteyim, qolçığından tutmağa isteyim… Sağındım, pek sağındım», – dep ayta Çiygoznıñ anası Aliye hanım.

Onıñ qısqaç hastalığı bar, bu hastalıq inkişaf etmege başladı ve endi ameliyat keçirilmesi mümkün degil. O, ağrını yoq etken şiddetli ilâclarnı içe.

Ahtem Çiygoznıñ babası qayd etti ki, o, apayınen beraber, «halqını ve Vatanını sevgen böyle oğlunı östürgenleri içün» iç te peşman etmeyler.

«Allahtan isteyim ki, o, anasını, iç olmasa, 5 daqqağa körsin, ve anası oğlunı körsin», – dep ayttı Zeytulla Çiygoz.

Ahtem Çiygoznıñ apayı ve mahkemede onıñ cemaat imayecisi Elmira Ablâlimova añlattı ki, mahkeme Ahtemge anasınen körüşmege razılıq berecegine soñuna qadar ümüt besley edi, amma «ümütler eşitilmedi».

«Ahtem, menden farqlı olıp, böyle hayallarğa ümğt beslemegen edi. Amma onıñ içün anasınen körüşmek pek müimdir, o, kerçekten de, ağır hasta. O, mahkemeden soradı ki, onı anasına iç olmasa on daqqağa yibersinler. O, dey edi: «Meni, iç olmasa, on daqqağa yiberiñiz ve bundan soñ men qaytacam ve siz meni mahküm etmege ve SİZO-da tutmağa istegeniñiz qadar devam eteceksiz», – dep ayttı Çiygoznıñ apayı, qaysı biri onen iyün 16-da saba SİZO-da körüşip oldı, dep bildire «Qırım.Aqiqat».

Bundan evel, iyün 15-te Ukraina Tışqı işler nazirligi Qırım ükümetinden Ahtem Çiygozğa hasta olğan anasınen körüşmege imkân berilmesini talap etti.

Hatırlatamız ki, yedi yıl evel Aliye ve Zeytulla Çiygozlar büyük oğlunı defin etti. Rustem Çiygoz 2010 senesi yanvar 3-te infarkt neticesinde vefat etti.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.