İçki (Sovetskoye) rayonındaki Tuzlu Şeyh Eli (Prisivaşnoye) köyünde uquq qoruyıcılar yerli sakin Tohtar Akimovnıñ evinde tintüv keçirdi.
Bundan evel belli oldı ki, iyün 15-te Ferngeym (Urojaynoye) ve Tuzlu Şeyh Eli köylerinde rusiyeli sıñırcılar politsiyanen beraber yerli sakinlerniñ pasportlarını teşkerip çıqtı.
«Saba saat 8-de onıñ (Tohtar Alimovnıñ, – Avdet) evine uquq qoruyıcılarnen maşna keldi. Olar, tahminen on beş adam edi. Evge kirdiler, Tohtarnı ve onıñ oğlunı birden tabanğa yatqızdılar, kelepçe taqmadılar. Hızmet köpegi iştiraginen tintüv keçirdiler. Tohtarnıñ esli-başlı anası yaramay oldı», – dep añlattı İnsan aqları boyunca Qırım kontakt gruppasınıñ idarecisi Abdureşit Cepparov.
Tohtar Akimovnıñ malümatına köre, tintüv keçirilgen soñ, onı Aqmescitteki (Simferopol) İçki işler nazirliginiñ baş idaresine ketirdiler, taqiqatçı onı sorğuğa çekti.
«Sorğu normal şekilde keçti, taqiqatçı maña basqı yapmadı. Parmaq izlerini qaldırmağa da talap etmediler. İş boyunca tafsilâtlı malümat berip olamayım, çünki etmeme aqqında imza ettim. Kündüz saat ekide meni endi yiberdiler», – dep añlattı Tohtar Akimov.
İçki rayonında keçirilgen reyd aqqında uquq qoruyıcılarnıñ izaatı şimdilik yoq, dep bildire «Qırım.Aqiqat».
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
