Qırım mahkemesi «Hizb ut-Tahrir» işi boyunca üç yaqalanğan kişini apiste qaldırdı

23.06.201717:45

İyün 23-te Qırım Yuqarı mahkemesi «Hizb ut-Tahrir» işi boyunca Yaltada yaqalanğan Muslim Aliyev, Arsen Cepparov ve Enver Bekirovnıñ apiste bulunma müddetiniñ devam ettirilmesine qarşı şikâyet arizasını lâğu etti.

Böyleliknen, olar, 2017 senesi avgust 8-ge qadar apiste qalacaq.

Toplaşuvlar qapalı şekilde keçirildi.

Bundan evel Qırım Yuqarı mahkemesi «Hizb ut-Tahrir» işi boyunca Yaltada yaqalanğan Vadim Siruknıñ şikâyet arizalarını red etti.

«Hizb ut-Tahrir işi» boyunca Yaltada ilk qabaatlanğanlar 2016 senesi fevral 11-de yaqalandı.  Olardan eñ belli olğan – İnsan aqları boyunca kontakt gruppasınıñ azası Emir-Üsein Kuku. Ondan ğayrı, qurucı olaraq çalışqanlar Aluştalı Muslim Aliyev ve Qızıltaş (Krasnokamenka) köyü sakini Enver Bekirov, bunen beraber, çiçekler satqan Yaltalı Vadim Siruk yaqalandı.

Qızıltaş (Krasnokamenka) köyüniñ sakinleri Refat Alimov ve Arsen Cepparov 2016 senesi aprel 18-de tintüvler keçirilgen soñ yaqalandı. Olar Rusiye Federatsiyası Cinaiy kodeksiniñ 205.5 maddesi 2-ci qısmı boyunca (Rusiyede terroristik tanılğan teşkilâtnıñ faaliyetinde iştirak etüv) qabaatlana.

Avdetniñ bildirgenine köre, «Hizb ut-Tahrir» işi boyunca yaqalanğan, davaları daa devam etken qırımtatarlar, mahkeme daa qarar çıqarmağanına baqmadan, terrorist ve ekstremistler cedveline kirsetildi.

İşbu cedvelde Emir-Üsein Kuku 3415 sanlı, Muslim Aliyev – 468, Arsen Cepparov – 2294, Rustem İsmailov – 2884,  Ayder Saledinov – 5199, Refat Alimov – 524, İnver Bekirov – 1231, Zevri Abseitov – 196, Rustem Abiltarov – 188, Enver Mamutov – 3994, Remzi Memetov – 4135, Vadim Siruk – 5362, Teymur Abdullayev – 110, Uzeir Abdullayev – 111 nomeri boyunca qayd etilgen.

Aynı bu cedvelge «Hizb ut-Tahrir» işi boyunca yaqalanğan Aqyarlı dört kişi kirsetildi, 2016 senesi sentâbr ayında olarğa qarşı qarar çıqarıldı.

Belli ki, 2016 senesi mayıs ayında «Hizb ut-Tahrir» işi boyunca yaqalanğan kişilerniñ apayları ve yaqınları «Qırım birdemligi» cemaat areketini teşkil etti. Onıñ idarecisi vazifesine yaqalanğan Ruslan Zeytullayevniñ apayı Meryem Zeytullayeva, idareciniñ yardımcısı vazifesine ise, yaqalanğan Muslim Aliyevniñ apayı Naciye Aliyeva saylandı.

İçtimaiy ağlarda Facebook, VkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası