«KrımSOS» cemaat teşebbüsi Bütün Dünya Qırımtatar Kongressi icra komitetiniñ azası Ervin İbragimovnıñ Qırımda ğayıp olması boyunca İnsan aqları boyunca Avropa mahkemesine dava açtıracaq ola.
Bu aqta cemaat teşebbüsiniñ idarecisi Tamila Taşeva bildirdi.
«Şimdi bütün vesiqalarnı baqıp ögrenemiz ve halqara uquqçılarnen tevsiyeleşecekmiz. Biz bunı «KrımSOS» taqımı ve Varşavada bulunğan «İnsan aqları boyunca Helsinki fondu» ile yapacaqmız. Bu davanı açtırmaq içün Ervinnıñ babasından razılıq aldıq», – dep añlattı Taşeva «Qırım.Aqiqat»qa.
Onıñ sözlerine köre, şimdiki vaqıtta bütün deliller cıyıla, ve bir ay içinde dava açtırılacaqtır.
Mayıs 24-te Bağçasarayda qırımtatar milliy areketi faali, Bağçasaray şeer şurasınıñ sabıq deputatı, regional meclis azası, Bütün dünya qırımtatar kongressiniñ İcra şurası azası Ervin İbragimov ğayıp oldı. Onıñ maşnası onıñ yaşağan evi yaqınlarında açıq turğan tapıldı. Ğayıp olğan, babasına aytqan edi ki, 36-cı region 350 sanlı Shkoda Octavia A 6 onı nezaret ete.
Ervin İbragimovnıñ tutulğanını onıñ evi yanındaki tükânda yerleştirilgen video nezaret kameraları qayd etti. Videoda körüne ki, Yol-patrul hızmeti hadimleri urbasındaki belli olmağan şahıslar gençni tutıp, onı beyaz renkli Ford Tranzit avtomobiline oturttı.
Bağçasaray faalleri, bunen beraber, qırımtatar faali Ervin İbragimovnıñ soy-sopları ve dostları qıdıruvnı teşkil etti. Ğayıp olğannıñ yaqınları Ervin İbragimov içün 1 million ruble mükâfat bermege azır olğanlarını bildirdi.
İyün 1-de Bağçasaraydaki «Arpat» restoranı yanında qaçırılğan Ervin İbragimovnıñ pasportı ve iş kitabı tapıldı.
Qırım boyunca RF Taqiq komiteti Ervin İbragimovnıñ babası bergen arizağa cevap berdi. Müessisenıñ matbuat hızmetinde bildirdiler ki, Rusiye Federatsiyası Cinaiy kodeksiniñ 126 maddesi 2-ci qısmınıñ «a,v» maddeleri (insannı qaçıruv) boyunca açılğan cinaiy iş taqiq etile. Ervin İbragimovnıñ bütün Rusiyede qıdırıluvı ilân etildi.
Avdetniñ bundan evel bildirgenine köre, Moskvada faaller belgisiz ğayıp olğan Ervin İbragimovnıñ fotoresimi ile levhalarnı astı.
Mart 15-te Avropa parlamentiniñ matbuat merkezinde Bağçasarayda qaçırılğan Ervin İbragimovnıñ babası Umer İbragimov, «fevral 26» işi boyunca yaqalanğan Mustafa Degermenciniñ babası Bekir Degermenci, bunen beraber, Qırım adliyecisi Emil Kurbedinovnıñ iştiragi ile matbuat konferentsiyası keçirildi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
