İyün 28-de Qırım Yuqarı mahkemesinde qırımtatar faali Ahtem Çiygoznıñ işi boyunca milletlerara munasebetler ve sürgün etilgen vatandaşlarnıñ meseleleri boyunca Devlet komitetiniñ yolbaşçısı Zaur Smirnovnıñ şaat olaraq sorğuğa çekilmesi yekünlendi.
«Qırım.Aqiqat»nıñ bildirgenine köre, Smirnov 2014 senesi fevral 26-da Qırım Yuqarı Radası yanında miting keçirüv içün mesüliyetli Meclis (Rusiyede 29.09.2016 yasaq etilgen) reisi Refat Çubarov olğanını ayttı. Şaatnıñ sözlerine köre, Çubarov bir özü, Meclis azaları rey bermeden, mitingni teşkil etti.
«O (Refat Çubarov, – Avdet), aytqan edi ki, sessiyanıñ keçirilmesine yol bermemek kerek, çünki bu, devletke qarşıdır. O, daima bağda bulunğan Amerika Birleşken Ştatları elçiliginden alğan fikirge esaslana edi, o vaqıt anda onıñ qızı çalışqan edi. O, o yerden emirler alğan edi, bularnı, demokratiya tarafdarlarından alınğan kibi taqdim etip, seslendire edi. Fevral 25-te Meclis toplaşuvında o, miting keçirilecegini aytqan edi. Yani, vaziyet, körüne ki, tıştan idare etilgen edi, bunıñ içün Çubarov nizamsızlıq ve qan tökülmesini peyda etmek içün bir alet oldı», – dep ayttı Smirnov.
Miting devamında, Smirnovnıñ sözlerine köre, o, Çubarovnen beraber Rada binasında buluna edi. Sessiya keçirilmeycegi aqqında belli olğan soñ, olar qapı aldına çıqtı, o yerde Çubarov bu aqta ilân etti ve er keske ketmege rica etti. Şaat Ahtem Çiygoznıñ fevral 26 vaqialarındaki rolü aqqında bir şey aytıp olamadı.
Avdetniñ evel bildirgenine köre, mahkeme Qırım parlamenti reisi Vladimir Konstantinovnı ve yarımada deputatı Lentun Bezaziyevni sorğuğa çekmege planlaştıra.
Hatırlatamız ki, iyün 27-de Qırım Yuqarı mahkemesi qırımtatar faali Ahtem Çiygoz imayesiniñ yarımada müftisi Emirali Ablayevni sorğuğa çekmek muracaatını red etti.
İçtimaiy ağlardaFacebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
