Tataristanda iyül 2 matem künü ilân etildi

02.07.201711:29

Tataristan cumhuriyeti prezidenti Rustam Minnihanov Zainsk rayonında büyük qaza yüz bergeni sebebinden matem ilân etilmesi aqqında qararnı imzaladı. Qaza neticesinde balalar da elâk oldı.

«2017 senesi iyül 2-de Zainsk rayonında yüz bergen yol qazası neticesinde elâk olğanlarğa nisbeten qaar-qasevetni bildirip, olarnıñ soy-sop ve yaqınlarına taziye bildirip, 2017 senesi iyül 2 künü Tataristan Cumhuriyetinde matem kününi ilân etmek avale etem», – dep aytıla cumhuriyet ükümeti saytında bazar künü yerleştirilgen fermanda.

Bazar kününe keçer gecesi Zainsk şeerinden doquz kilometr uzaqlığında «KamAZ» yük maşnası ve «Neoplan» yolcu avtobusınıñ iştiragi ile qaza yüz berdi. «Samara-İjevsk» marşrutınen ketken avtobus yolda avdarıldı ve yandı. Qaza neticesinde 13 adam (bu cümleden, 2 bala) elâk oldı, 15 kişi zararlandı.

Matem künü cumhuriyette Tataristan devlet bayraqları alınacaq, televizion ve radio şirketleri ve medeniyet müessiselerine eglence programmaları ve merasimlerini lâgu etmege teklif etildi.

Bunen beraber, Tataristan prezidenti imzalağan fermanında cumhuriyet nazirler kabinetine qaza neticesinde elâk olğanlarnıñ qorantalarına ve zararlanğan kişilerge yardım etüv boyunca teklifler azırlamağa avale etti.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET