Tünevin aqşam Qırımda Moskva yolunda Qurman (Krasnogvardeyskoye) rayonınıñ Büyük Onlar (Oktâbrskoye) köyü civarında yüz bergen qaza neticesinde eki yaş oğlan elâk oldı.
Olarnıñ biri, Adil, belli qırımtatar yırcısı Elvira Sarıhalilniñ torunı edi. Elvira Sarıhalil vaqia aqqında Facebook saifesinde bildirdi.
«Biz bugün Adilnen vedalaşamız… Men ise, bu, tüş olğanına işanmağa tırışam. Adilçik pek istidatlı edi. Er şey elinden kelgen edi. Yardım sorağanlarğa iç «yoq» demez edi. O, muvafaqiyetli sportçu, çalğıcı edi. Ramazanda orazanı mesüliyetli tutqan ve din mevzuları boyunca subetleşmege sevgen edi. O, tuvğan Qırımnı pek seve edi. Öz vatandaş noqta-i nazarlarında daima qattı turğan edi. Adilniñ ruhuna dua oqumañıznı rica etem», – dep yazdı o.
Şaatlarnıñ sözlerine köre, Aquladan (Mendeleyevo) Büyük Onlarğa Deo Tico maşnasınen ketken yigitler mikroavtobusnen çatıştı.
Avdet gazetasınıñ muarririyeti elâk olğan yigitlerniñ qorantalarına teren taziye bildire. Allah rahmet eylesin!
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.