Bağçasarayda keçirilgen tintüvlerniñ şaatı 150 biñ para cöremesinen cezalandı

07.07.20178:54

İyül 6-da Bağçasaray mahkemesi Bağçasarayda keçirilgen tintüvlerniñ şaatı Emil Belâlovnı «qanunsız mitingde» bir daa iştirak etkeni içün 150 biñ ruble para cöremesinen cezaladı.

Bu aqta Server Mustafayev bildirdi.

«Mahkemede video seyir etilgende, añlaşılmamazlıq oldı. Mesele şunda ki, Emil ve Emin eki egiz ağa-qardaş ola. Olarnıñ daa üçünci ağası bar. O, olardan büyük, amma olarğa pek oşay. Videolarda öyle oldı ki, taqiqatçı olardan kim olğanını bilmedi. Amma nasıldır bu adam sürüsinde bu kişiler anda bar olğanı qayd etildi. Amma mahkeme, aynı bir madde boyunca ekinci qanun bozuvı içün, 150 biñ ruble para cöremesinen cazalamaq qararını çıqardı», – dep bildire «Qırım.Aqiqat» Mustafayevniñ sözlerini.

Onıñ malümatına köre, Emin Belâlov boyunca mahkeme keçirilmedi, oña nisbeten de memuriy protokol tizilgen edi.

«Taqiqatçı eki protokol tizdi, amma ağa-qardaşlardan birini yibermek qararını aldı. Onıñ işi boyunca bugün mahkeme olmadı. Ne içün böyle qarar alınğanı añlaşılmay. Endi onıñ işi boyunca mahkeme olacaqmı, yoq – belli degil», – dep ayttı o.

Mustafayev qayd etti ki, imaye tarafı mahkeme qararına şikâyet etmege niyetlene.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası