İyül 4-te Bağçasaray merkez rayon hastahanesiniñ loqsahane bölüginde Topçiköy (Dolinnoye) köyüniñ 32 yaşındaki sakini Lemara Narzullayeva balanı doğurğanından bir qaç saattan soñ elâk oldı. Onıñ yaqınları yerli ekimlerni qabaatlay. Vefat etken Lemaranıñ daa bir balası qaldı.
Lemaranıñ ağırayaqlılığı yahşı keçe edi. Lâkin, soñki aftalar onıñ büyrekler olğan yeri pek ağırıp başladı. Doğuruvdan dört kün evel Lemaranı hastahanege yatqızdılar, amma o, bu yerge afta soñu künleri tüşti ve, ana-baybasınıñ sözlerine köre, iç tedaviylenmedi. Bazarertesi künü qadın talilden keçti, onıñ neticelerine köre, ölgen kişiniñ babası aytqanı kibi, Lemara acele şekilde Aqmescit (Simferopol) perinatal merkezine ketirilmek kerek edi. Amma bunıñ yerine ekimler sezaryen (kesarev) ameliyatını yapmağa qarar aldı.
Ameliyat neticesinde qadın çoq qan coydı. Ekimler bala yatağını yoq etmege qarar aldı. 5 saat devam etken ameliyattan soñ qadınnıñ yaqınlarını er şey yahşı olacaq dep işandırdı.
Amma dört saattan soñ Lemara vefat etti. Ölümniñ resmiy sebebi — bala yatağında kertik.
«Onı tek Aqmescitke alıp ketmek kerek edi!» – dep ayta Lemaranıñ babası.
Hastahane baş ekimi ve doğuruvda iştirak etken ekimler, bu, tibbiy sır olğanını aytıp, vaqiağa izaat bermekten vazgeçti.
Elâk olğan qadınnıñ ana-babası uquq qoruyıcı organlarına muracaat etecek ola.
Lemara Narzullayeva oğluna ömür berip, bu dünyanı terk etti. Anasınıñ arzusı köz ögüne alınıp, oña Suleyman adı berildi. Bunen beraber, Lemaranıñ üç yaşındaki Samir-Sultan adlı oğlu qaldı, dep bildire Crimeantatars.club.
