İyül 11-de Qırım Yuqarı mahkemesinde qırımtatar faali Ahtem Çiygoznıñ işi boyunca şaat olaraq yarımada parlamenti deputatı Lentun Bezaziyev sorğuğa çekildi.
Bezaziyev 2014 senesi fevral ayında Qırım Yuqarı Radası deputatı edi, mahkemege imaye tarafı teşebbüsinen davet etildi.
Bezaziyev añlattı ki, o kün Ahtem Çiygoznı körmedi. Onıñ sözlerine köre, deputat fevral 26-da Nazirler şurası binasından Yuqarı Radağa üyle keldi ve maniasız içine kirdi, o yerde deputatlar nevbetten tış sessiyağa toplaşa edi. Umumen olaraq, Bezaziyevniñ sözlerine köre, 48 adam toplaştı, kvorum içün üç deputat yetmedi, dep bildire «Qırım.Aqiqat».
«Doğru hatırlağan olsam, liftler bile söndürildi. Men Konstantinovnıñ yanında edim. Yanımızda Aksönov. Refat Çubarov kire ve ayta: «Mennen kim meydanğa baracaq?». Aksönov tura ve ayta: «Men siznen baracam». Men raat oldım, öz işimnen oğraşam. Soñra kimse çapıp kele ve ayta: «Tatarlar holğa sürip kirdi». Hatırlağan olsañız, zapadenetsler, yani «banderovetsler», ğarpta (Ukraina ğarbında, – Avdet) memuriyetlerge ücüm etken edi, «Molotov kokteylerini» ata ve er şeyni yaqa edi. Men tüşündim ki, ekinci qatqa sürip kire bileler. Bir saniye içinde birinci qatqa tüştim. Böyle çıqışlarda çoqusı yaşlar iştirak ete. Şimdi 15 yaşındaki oğlanlar Moskvada çıqqanları kibi. Aqılnı soñra çalıştırıp başlaylar», – dep ayttı Bezaziyev.
Lentun Bezaziyev, 2014 senesi fevral 26-da yüz bergen vaqialar aqqında añlatqanda, qayd etti ki, o, toplaşqanlar arasında gençler ola bilgeninden qasevetlene edi.
«Men merdiven yanında turdım, baqam ki, olarnıñ arasında büyükler ve eki oğlan bar. Men olarğa añlatam, – olar añlamay. Yahşı ki, büyükler… Men şundan qasevetlene edim ki, birinci qat – tehnikiy qat, anda kimse şişe atsa, bir şey olmaz, ekinci qatta ise vesiqalar bar. 30 daqqa olarnı sakinleştirmek mecbur oldım. Yahşı ki, anda meni tanığan büyükler bar edi. Aytam: «Artqa qaytıñız». Men bilmedim, amma kimse video çıqara edi, soñra olarnen foyede laf etkenimi kösterdiler. Refat Çubarov ve qalğan arqadaşlarnıñ qayda coyulğanını bilmeyim. Er şey buña ketirecegini tasavur etip olamaz edim. Soñra, kelecek kün, elâk olğanlar aqqında haber aldım», – dep qoştı Bezaziyev.
Onıñ sözlerine köre, deputatlarğa Qırım Yuqarı Radası binasına kirmege kimse mania olmadı. O, fevral 26-da toplaşuvğa kelmegenlerniñ «siyasiy ucuzları» olğanlarını ayttı.
«Bugün seniñ küçüñ bar – saña qol tutalar. Yarın vaziyet deñişe – seni bilmege istemeyler. Ucuzlar», – dep ayttı Bezaziyev.
«Ne qadar bu kibi deputat oldı?», – dep ondan soradı adliyeci Nikolay Polozov.
«Kvorum olmağanı içün er kes özüni tüşüne edi. Ya bu, ya şu taraf yeñecek, dep», – dep ayttı şaat. «Qorqtılarmı?», – dep soradı mahkemeci.
«Hameleonlar. Furtuna yoq edi, buzlavuq yoq edi. Al da kel! Men olğanını aytam», – dep cevap berdi Bezaziyev.
Onıñ sözlerine köre, Qırım Yuqarı Radası binasında bu kün bir şey sındırılmadı, miting iştirakçileri Radanıñ sessiyasını keçirmemek qararı alınğan soñ içine kirdi. Çiygoz, onıñ sözlerine köre, olarnen bağlı degil edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
