Ukraina Yuqarı Radası Qırım Muhtar Cumhuriyetiniñ adını deñiştirmek qararına keldi. Bu meselenen devlet Anayasasına deñişmeler kirsetken iş gruppası oğraşa.
Bu aqta ukrain kütleviy haber vastaları bildire.
Umumen olaraq, dört variant baqıla, bunen beraber, ameldeki adnıñ qaldırılması mümkün. Amma qanun çıqarıcıları Qırımtatar muhtariyeti adınıñ berilmesi tarafını tuta.
Kütleviy haber vastalarınıñ qayd etkenlerine köre, «muhtariyet» sözü qırımtatar halqınıñ unitar ukrain devleti terkibinde öz-özüni idare etüv aqqınıñ ömürge keçirilecegini bildire.
Bundan evel Ukraina prezidenti Petro Poroşenko anayasa komissiyasına Qırım statusı aqqında deñişme leyhasını azırlamağa avale etti. Onıñ sözlerine köre, Qırım Muhtar Cumhuriyetiniñ unitar devletniñ terkibinde bulunması imkânsızdır. Bunen beraber, mayıs ayında Ukraina anayasa komissiyası QMC-nen bağlı anayasadaki tüzetmeler (Esas qanunnıñ 10-cı bölügi) boyunca tekliflerniñ işlep çıqarılması içün iş gruppasını teşkil etti. Hususan, ekspertler ukrain anayasasında «Qırım Muhtar Cumhuriyeti» adından vazgeçip, onı «Qırım muhtariyeti» ya da «qırımtatar muhtariyeti» dep adlandırmağa teklif ete.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
