Aqmescitteki (Simferopol) Vorovskogo soqağında evel Qalğa-Sultan saray kompleksi ve XV asırğa ait olğan Qırım Hanlığı zamanındaki cami bulunğan yerde qurucılıq işleri yañıdan başlandı.
Bu aqta içtimaiy ağlar qullanıcıları bildire.
«Qadimiy «Qalğa-Sultan» bulunğan yerde basa-bas qurucılıq işleri alıp barıla! Bu yerni er kes, istegeni kibi, nişaretley! Eger bu yer, kerçekten de, o qadar müim olsa ki, közetkenim 7 yıl devamında iç bir qurucılıq eki künden ziyade sürmedi, bu qurucılıq ise endi eki aftadan ziyade devam ete!» – dep yazdı bu rayonda yaşağan Qırım ressamı ve dizayneri Mayre Lüman Facebook saifesinde.
Onıñ sözlerini qırımtatar milliy areketiniñ faali Zair Smedlâyev tasdıqladı.
«Belli olmağan şahıslar o yerde qurucılıqnı başladı: temelni qoya, beton töke, territoriyanı qoraladı. Asılında, bu, tarihiy bir yer, anda qazmalarnıñ keçirilmesi planlaştırılğan edi», – dep bildirdi Smedlâyev içtimaiy ağdaki saifesinde.
2015 senesi Qırım müftisi Emirali Ablayev cumhuriyet yolbaşçısı Sergey Aksönovnen körüşken soñ, bu yerde qurucılıq işleri toqtatıldı. Tarihçılarnıñ malümatına binaen, bu yerde orta asırlarğa ait olğan Qalğa-Sultan saray kompleksi, bunen beraber, XV asırda I-ci Meñli Geray tarafından qurulğan cami yerleşe edi.
Avdet gazetası bu mevzuğa bağışlanğan Qırım alimi Nariman Abdulvaap ve tarihçı, «Qırım memleketi» rubrikamıznıñ müellifi Oleksa Gayvoronskiyniñ bir sıra maqalelerini derc etti.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
Foto: Mayre Lüman
