Qırım yolları kenarındaki haçlar yoq etilecek

31.07.201713:10

«Тavrida» yolu qurulğan territoriyasına tüşken, Qırım sakinleri tarafından qaza qurbanları olğan soyları ve yaqınlarına bağışlanıp qoyulğan haçlar yoq etilecek.

Bu aqta Qarasuvbazar (Belogorsk) rayon memuriyetiniñ matbuat hızmeti bildirdi.

Qazalar yüz bergen yerlerde, yol kenarında öz isteginen abidelerni qoyğan adamlarğa bir ay içinde olarnı yoq etmege rica etile. Akis alda abideler çıqarılıp yoq etilecek. Qayd etilgen müddet bitken soñ bu mesele boyunca şikâyetler qabul etilmeycek.

Qarasuvbazar rayon memuriyeti «Tavrida» yolu qurulğan zonasında bulunğan obyektlerniñ cedvelini paylaştı. Qaza qurbanlarına bağışlanğan abidelerden ğayrı, cedvelge mesken yerler ve müessiselerniñ adlarını bildirgen tikilitaşlar, hatıra levhaları ve haçlar kirsetildi. Umumen olaraq, Yedi Quyu (Lenino), Qarasuvbazar ve Aqmescit (Simferopol) rayonlarındaki 21 obyekt qayd etildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.