Tünevin, iyül 31-de, İslâm Terekte (Kirovskoye) yarımada sakinleri Qarasuvbazar (Belogorsk) civarında qazağa oğrap elâk olğan ailenen vedalaştı.
Avdetniñ evel bildirgenine köre, iyül 29-da, tahminen saat 17:00-de deşetli qaza neticesinde İslâm Terek sakini Osman Nagaş, onıñ apayı, qızı ve torunı elâk oldı.
Cenazege, o yerde bulunğanlarnıñ malümatına binaen, tahminen üç biñ adam keldi.
Qırım Yol areketi havfsızlığı devlet inspektsiyası matbuat hızmetiniñ malümatına binaen, VAZ 21115 maşnası qarşı taraf yolğa çıqtı ve Ford Focus avtomobiline uruldı. Ford maşnası içinde üç adam, bu cümleden, 16 yaşındaki ösmür bar edi. İlk malümatlarğa binaen, VAZ avtomobiliniñ aydayıcısı ve eki yolcusı, bu cümleden bala, birden elâk oldı. VAZ yolcusı olğan qadın hastahanede vefat etti. Ford yolcuları da zararlandı.
Avdet gazetası elâk olğan qorantanıñ yaqınlarına taziye bildire. Allah rahmet eylesin!
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
