Aqmescit etrafında yerleşken bir köyniñ sakinleri KAMAZlarğa cenk ilân ettiler

06.08.201717:06

Aqmescit (Şimferopol) etrafındaki Kurtsı köyüniñ sakinleri geceleri yuqlap olamaylar. Bunıñ sebepleri – yaqın yerde yerleşken karyerde patlavlar, “Tavrida” yolunıñ qurucılığı içün yaqında yerleşken karyerden çaqıl taşığan yük maşnalarınıñ gürültisi ve neticede peyda olğan toz direkleridir.

Köy sakinleri buña gece kündüz dayanmaq kerekler.

“Bu sıcaqta pencerelerni açmağa imkân yoq. Amma şimdi olarnı gece de açıp olamaymız: sesler ve tozdan yuqlamağa çare yoq”, – dep añlata yerli sakin İldar İbragimov.

Mesele şunda ki, kündüz ava arareti yüksek olğanı içün KAMAZlarğa yürmege izin bermeyler.

Müşkül alğa kelgen Kurtsı sakinleri gece yolğa çıqıp, yük maşnalarğa yolnı qapattılar, kündüz ise narazılıq bildirip, piket yaptılar.

“Yarım saat içinde insannıñ üstü bütünley toz ola ve adam ses, gürültülerden, artıq, bir şey eşitmey. Biz bu vaziyetni deñiştirmege ve karyer maşnalarnıñ başqa yolnen yürmelerini rica etemiz”, – dep çağıra köy sakini Yuliya.

Köy sakinleri ballarnı bir özlerini mektepke yollamağa qorqalar, çünki yüklü maşnalarnıñ aydavcıları olarnı idare etip olamazlar dep qasevet eteler.

Bundan da ğayrı, olarnıñ sözlerine köre, yük maşnaları köy yolunı bozalar.

Piketler birinci neticeler berdiler. Keçken gece yük maşnaları köyden keçmey ediler. Amma köy sakinleri bu sessizlik çoq devam etmeyceginden qorqalar. Bazaertesi künü olar bu vaziyetni köy başlığı ve karyer saibinen muzakere etmek kerekler. Köylüler yük maşnalarınıñ keçme yollarını deñiştirmege ve köyge kirmeden aylanıp keçmelerini, bozulğan yollarnı ğayrıdan yapılmasını talap etken kollektiv mektüp azırladılar, dep haber ete Crimeantatars.club.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.