Tünevinden berli Sudaq etrafındaki Qapsihor (Morskoye) köyünde dağ yanğınını söndürip olamaylar.
Yerli sakinlerniñ aytqanına köre, yanğınnıñ sebebi olıp keçken yol qazası olabilir. 5-ci avgust künü saat 11-ge yaqın göl yanına ekskursiyağa kelgen insanlarnı ketirgen UAZ maşnası avdarılıp, yanmağa başladı. Anomal sıcaq ve yel ateşni dağnıñ büyük mesafesine tarqattı. Aynı vaqıtta, bugün saba MÇS matbuat hızmetinde yanğınnıñ sebebi maşna olğanı aqqında malümatnı tasdıqlamadılar.
Qaza yerinde Qırımnıñ farqlı regionlarından MÇS hadimleri çalışmaqta. Dağnıñ yanğan yerlerine suv tökken vertolet te işletilmekte.
İnternette dağda, büyük yanğın başlağan yerden video peyda oldı. Şu videoda bir tarafına yuvarlanıp, er taraftan yanğan maşna körünmekte.
Yerli sakinler yanğın tarqalmağa devam etkenini haber eteler, dep bildire Sudak.me.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.