Qırımnıñ Yuqarı mahkemesiniñ bugünki oturuşında qırımtatar milliy areketiniñ iştirakçisi, mabus Ahtem Çiygoznıñ işi boyunca prokuror Anastasiya Supryaga ceza olaraq 8 yıl apishane müddetini talap ete.
Prokuror deliller maznunnıñ qabaatlı olğanını ve olarnıñ kerçek olğanında şube olmağanını ayta.
Onıñ sözlerine köre, «mahkeme taqiqatında maznunnıñ qabaatı tolusınen isbatlandı». Prokuror, 2015 senesiniñ mayıs ve iyün aylarınıñ mahkeme tıbbiy ekspertlerniñ hulâsalarına ve Sergey Aksyonov, Zaur Smirnov, Eyvaz Umerov, Sergey Tsekov, Olga Kovitidi, Vladimir Konstantinov ve üç gizli şaatlarnıñ malümatlarına esaslana.
Bundan ğayrı, prokuror Ahtem Çiygoz adamlarnı sıralağanı (26 feral 2014 senesinde Qırımnıñ Yuqarı Şura binası ögünde) videofayllar aqqında da añıp, keçti. Qabaatnıñ başqa delilleri olaraq, prokurornıñ sözlerine köre, qabaatlarnı qabul etken Yunusov, Kantemirovnıñ kelmeleri ve Eskender Nebiyevniñ cevaplarıdır. Qorçalav şaatlarnıñ malümatları qalğan delillerni red etmeyler, dep saya qabaatlayıcı, haber ete «Qırım.Aqıqat».
Qabaatlayıcı qararını böyle izaat etti: «Qırımnıñ qoşulmasından soñ, vatandaşlarnıñ aq ve menfaatını qorçalamaq içün Rusiye qanunları evel yapılğan cinayetler içün de qullanıla bile».
7 avgust künü Qırımnıñ Yuqarı mahkemesinde Ahtem Çiygoznıñ cinaiy işi boyunca munaqaşalar başlandı. Oturışqa üç zarar körgen insan – Fatuyev, Baranov ve Solovyev keldiler. Maznunğa qol tutmaq içün, tahminen, 50 insan, olarnıñ arasında İlmi Umerov ve başqa qırımtatar milliy areket iştirakçileri keldi. Zalda boş yer yoq edi, insanlarnıñ bir qısmı oturışqa kirip olamadı.
Ahtem Çiygoz 2015 senesiniñ yanvar ayından 26 feral 2014 senesinde Qırımnıñ Yuqarı Şura binası ögünde Ukrainanıñ territorial bütünligi desteginen bağlı mitingte iştirak etkeni sebebinden tutuqlanğan edi. O vaqıtta miting iştirakçilerine qarşı Rusiye taraflı insanları, olarnıñ arasında «Russkoye Yedinstvo» («Rus Birligi») firqasınıñ temsilcileri çıqtılar. Çiygoznı o alıp barğan kütleviy nizamsızlıqta qabaatlaylar.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
