Çoq balalı ailenıñ munasip örnegi – Sahtara ailesi

08.08.201710:34

Qadır ve Reğane Sahtara ailesi. Balları: Reşid (fotoda yoq, çünki o vaqıtta orduda edi), Mümine, Saniye, Mamed, Usein, Asan, Ayşe, Mavile, Lilâ, Ali.

Angren şeeri, 1972 s.

Cian cenkini, deşetli sürgünlikni, Vatanğa ağır avdetni körgen bizim ecdatlarımız çoq bala tapmağa ve östürmege qorqmadılar. Olar şimdiki zemaneviy nesil, bizler içün munasip örnektir. Nevbetteki ikâyemiz bu sözlerniñ pek yahşı örnegidir.

«Ana-babalarımız – Reğane ve Qadır Sahtara Aluşta regionınıñ Üsküt (Privetnoye) köyünden. Sürgünlikten soñ babamıznıñ ana-babaları Taşkent oblastiniñ Angren şeerine tüştiler (o vaqıtta olarnıñ ballarını Kuybışev şeerine iş ordusına aldılar). Açlıq ve sıtma hastalığından, ana-babları oğullarını körmeyip, rahmetli oldılar… Olarnıñ cenazelerini çareleri olğan barak qomşuları keçirdiler…

Anam 18 mayıs gecesinde öz tatasında musafirlikte olğan, bu sebepten ana-babalarından ayrı sürgün etilgen edi. Komendant zamanları olğanı içün olarnı tapıp olamadı. Anamız Angrenge tüşti, ana-babaları ise –«Pyatiletka» sovhozına.

Anam genç qız olıp, şahtada çalışa, kömürnen vagonlarnı toldura edi… İşniñ qarşılığı ise bir çuval kömür edi. O çuvalnı pitege deñiştire ediler. Babam bütün ömür qurucılıqta çalıştı, taşçı edi. Aşqa toymağanı içün ve ağır iş sebebiniden aşqazan ve ülser hastalıqlarını qazandı. 1959 senesi aşqazanına ameliyat keçirdi. Milleti sebebinden oña sahatlıqnı bermediler. Yengil işke keçirmek ricasını da yerine ketirmediler.

Ailede biz 12 bala, aramızda eki çift egiz bar edi. Eki qızçıq küçük olğanda rahmetli oldılar: birisi qızamıqtan, başqası – aq ciger yanğısından. Beş ağamız deñiz flotında hızmet ete edi. Ana-babalarımız pek sayğılı insanlar ediler. Babamız ballarğa qarşı pek sert, anamız ise ballarğa emekke sevgi aşlağan utançaq, aqıllı, namuslı qadın edi. Ana-babalar Qırım aqqında fikirlernen yaşay, iç bir vaqıt tuvğan Üskütni unutmadılar. Babamız közyaşlarnen sürgünlik, Qırım ve Vatanda qalğan bağlar, tabiat aqqında tarif ete edi.

Bizler öz ailelerimizni qurğan soñ, ana-babalarımıznıñ omuzlarında nasıl yük yatqanını añladıq, çünki 10 balanı terbiye etmek – bu büyük mesüliyetliktir. Bundan ğayrı ana-babalarımız bütün ömür hocalıqnen oğraştılar: gektarlarnen sebzeler saça, yüzüm, şeftali, armut bağlarına baqa ediler. Babamıznıñ tuvğan Üskütke qaytmağa imkânı olmasa da, Qırımğa kelgenine pek quvanğan edi. Ailemiz Qarasuvbazarda yerleşti. Qırımğa kelgen soñ eki yıl keçip, 1994 senesinde, o, rahmetli oldı. Anamız 2002 senesinde bu dünyadan köz yümdi. Oña, eki kere «Mat-geroinya» («Qaraman ana») mükâfatı berildi.

Ana-babalarımıznıñ ömürlerinde eñ müim şey – munasip nesilni yetiştirmek edi ve olar bunı pek yahşı becerdiler. Biz 10 balamız, 28 torun, 32 torunçe. İç bir ayat ağırlıqlarğa baqmadan men er bir qırımtatar ailesine munasip ballarnı doğurmağa ve terbiye etmege tileyim. Eger er bir ailede 4-5 bala olsa, biz öz medeniy qıymetliklerimizni saqlap olurmız, öz milletimizni ğayrıdan tiklermiz».

Слева направо_Сание, Мавиле, Айше, Мумине, Лиля Сахтара

Soldan sağğa: Saniye, Mavile, Ayşe, Mümine, Lilâ Sahtara

Решид, Мамед_рахметли_Усеин_ Асан_Али

Reşid, Mamed (rahmetli), Usein, Asan, Ali

Mavile MECİTOVA, Mümine LAGUYEVA

 

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

 

Öz ikâyeleriñizni avdetgazeta@gmail.com adresine yollañız.

Müellif fikiri muarririyetniñ fikirinen aynı olmayabilir.

 

Фото аватара

Автор: Редакция Avdet

Редакция AVDET