Advokat Nikolay Polozov Qırım Yuqarı mahkemesi qırımtatar faali Ahtem Çiygoz içün ceza olaraq 6-7 yıl qapatılması qararını alacağını tahmin etti.
Nikolay Polozov 7 avgust künü olğan mahkeme oturuşınıñ neticelerine yekün çekti.
Onıñ fikrine köre, üküm çıqarılğan soñ, rus akimiyeti «bu vaqıanı siyasiy bazarlıqta qulanacaq».
«Ahtem Çiygoz içün bir orta müddet, tahminen 6-7 yıl, seçilgeni bellidir. Mahkeme bu müddetni tasdıqlaycaq ve neticede onıñ azat etilüvi içün akimiyet belli bir siyasiy imtiyazlarnen bazarlıq etecek», – ayttı advokat.
Avdet haber etkenine köre, Çiygoznıñ işi boyunca prokuror Anastasiya Supryaga ceza olaraq 8 yıl apishane müddetini talap ete. Onıñ sözlerine köre, «mahkeme taqiqatında maznunnıñ qabaatı tolusınen isbatlandı».
7 avgust künü Qırımnıñ Yuqarı mahkemesinde Ahtem Çiygoznıñ cinaiy işi boyunca munaqaşalar başlandı. Oturışqa üç zarar körgen insan – Fatuyev, Baranov ve Solovyev keldiler. Maznunğa qol tutmaq içün, tahminen, 50 insan, olarnıñ arasında İlmi Umerov ve başqa qırımtatar milliy areket faalleri keldi. Zalda boş yer yoq edi, insanlarnıñ bir qısmı oturışqa kirip olamadı.
Ahtem Çiygoz 2015 senesiniñ yanvar ayından 26 feral 2014 senesinde Qırımnıñ Yuqarı Şura binası ögünde Ukrainanıñ territorial bütünligi desteginen bağlı mitingte iştirak etkeni sebebinden tutuqlanğan edi. Çiygoznı o alıp barğan kütleviy nizamsızlıqta qabaatlaylar.
Foto: Qırım.Aqıqat
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
