Qırım mahkemesi keçken sene yarımadadan sürgün etilgen Nedim Halilovnıñ arizasını ve qorumasınıñ sürgün etilüvi boyunca icra işini toqtatmaqnı qanaatlendirmedi.
Bu aqta 7 avgust künü öz Facebook saifesinde Qırım advokatı Emil Kurbedinov haber etti.
«Mahkemede icra hızmetiniñ temsilcisi de bar edi. O, Nedim Halilovniñ sürgün etilüvi boyunca icra işini toqtatmamaqnı rica etti», – yazdı Kurbedinov.
Advokat Halilovnıñ advokatları icracılar «er şey içün esabat bermelerini ve Nedim Halilovnı azatlıqtan marum etkenleri boyunca nasıl esaslalar olğanı añlatmaları» boyunca ariza bereceklerni qoştı.
«Oñın, Qırımdan tış yüz kilometrler uzaqlıqta yabancı vatandaşlarnıñ vaqıtınca tutma merkezinde qapalması, artıq, kerek olğan çıqarma usulına degil de, cezağa ve azatlıqtan marum etüvge çevirildi», – dep qayd etti Kurbedinov.
Avdet haber etkenine köre, Nedim Halilovnı mahkemeniñ qararına esaslanıp, Qırımdan çıqardılar. Sürgün etilüviniñ sebebi — onıñ elindeki olğan sovet pasportıdır. O, başqa vesiqalarnı printsipial şekilde almadı. Adam bir qaç ay Krasnodarda Lazarevskiy rayonınıñ Vardana köyüniñ mahsus yerinde tutulğan edi. İyünniñ soñunda onı Stavropoldeki hususiy qabul etme yerine keçirgenleri belli oldı.
Nedim Halilov açlıqnı ilân etken edi. O, onı kene de yarımadağa qaytarmasını ve vatandaşlığı olmağan, amma milliy mensüpligi qayd etilgen, yani «qırımtatar» dep yazılmasını talap ete.
Nedim Halilov Rusiye prezidentine — Vladimir Putinge mektüp ile muracaat etken edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
