Vernadskiy adına Qırım federal universitetiniñ rektorı – Sergey Doniç öz isteginen istifağa çıqmaq içün ariza yazdı.
Bu aqta Rusiye Federatsiyasınıñ tasil ve ilim nazirligindeki menbağa atıf etken «Krıminform» haber ete.
«Ariza kerçekten yazılğan, istifa emiri endi azır. Rektor vazifesini Falaleyev Andrey Pavloviç eda etecek», – dep ayttılar nazirlikte.
Falaleyev – tehnik ilimler doktorı, Sankt-Peterburgtaki «Politeh» istisal tehnologiyalar institutınıñ müdiridir.
Sergey Doniç 2014 senesi Qırım Muhtar Cumhuriyeti ükümetiniñ baş-nazir muavini vazifesini qaldırıp, Vernadskiy adına Qırım federal universitetiniñ başına keçti.
Hatırlatamız ki, QFU rektorlığı üzerinde qavğa aprel ayında peyda oldı. Sergey Doniçniñ istifağa ketmesine Sergey Aksyonov Rusiya tasil ve ilim nazirliginiñ qol tutmasına ümüt beslep, teşebbüs kösterdi. Aksyonovnıñ sözlerine köre, QFUda çalışma ştatı ziyade kösterilgen, keçken seneniñ federal programmasınıñ tek üçte biri işletilgen. Doniç, muhbirlerge bildirgenine köre, o, istifağa tek univetsitetni meydanğa ketirgen Rusiye Federatsiyasınıñ Tasil Nazirligi qararınen ketecegini aytqan edi.
QFU 2014 senesinde meydanğa ketirildi. O, Qırımnıñ bir sıra universitet, kollej ve ilmiy teşkilâtlarnı birleştire.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
