Foros avtostantsıyası etrafında kempingdeki yanğın vaqıtında Moskovadan 9 yaşından 16 yaşına qadar 49 bala ve 10 büyük insan bar edi.
Hatırlatamız, 8 avgust künü, Qırımnıñ cenüp yalısındaki Foros rayonındaki bala lagerinden yanğın sebebinden ballarnı acele surette tahliye ettiler. Yanğın meydanı 365 kv metrden ibarettir – üç küçük ev ve etrafındaki quru ot yana edi. Zarar körğenler yoq.
Öz közünen körgen adamlarnıñ aytqanına köre, kemping yana edi. Başqa malümatlarğa köre, yanğın maşnalar bazası yerinde, ustahanede başlağan.
Yanğın tütüni Yaltanıñ farqlı taraflarından körüne edi. Keskin yel sebebinden qurtarıcılarnıñ vazifesi ağırlaştı, amma kimse zararlanmadı, yanğın söndürilgen edi.
Yanğın neticesinde insanlar yaşağan treylerler, sayding ile qaplı evçikler ve çoq yıllıq ekilgen terekler yandılar. İş adamınıñ mülkü, vesiqaları ve yaşağan insanlarnıñ şahsiy eşyaları yoq etildi. Ballarnı tahliye etmege yetiştirdiler, olar «Laspi» lagerinde yerleştirildiler.
Kemping sayding ile qaplı ve maden kirametli bir qaç evçikten ibarettir. Yanında buksir etilgen maşna tirkeme üyüri bar. İlk haberlerge köre, yanğınnıñ sebebi – gaz ile ballonnıñ patlaması oldı. Amma fevqulade vaziyet nazirliginiñ hadimleri bunı red ettiler. Olarnıñ sözlerine köre, yanğın etrafındaki bütün ballonlar olar tarafından vaqıtında çıqarılğan ediler.
Şimdi yanğın sebeplerini ögreneler. Köy sakinleri kempingni intiqam almaq içün yaqqandırlar dep tahmin eteler. Kemping saibi – Valentin Belogrudov da kempingni birisi aselet yaqqanında emin. Onıñ sözlerine köre, yanğın olğan etrafta altı yerde yanma nesneleri qoyulğan, fevqulade vaziyet nazirliginiñ hadimleri kerek olğan analizlerni ekspertizağa aldılar. Fevqulade vaziyeti nazirliginiñ matbuat hızmetinde altı yerde yanma nesneleri qoyulğanı aqta bir şey aytıp olamadılar, amma ekspertiza kerçekten de keçirile. Yani yanğınnıñ resmiy sebepleri daa belli degil, dep bildire «Primeçaniya».
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
