Belogorsk rayonındaki tintüvden soñ: bir insan apis etilgen, ekisi Qırımnı terk etti

11.08.201717:51

 

Tünevinki Qarasubazar (Belogorsk) rayonınıñ Üç Köz (Novoklynovo) köyündeki sakinleriniñ evinde olıp keçken tintüvden soñ, aileniñ babası ve orta oğlu yarımadanı terk ettiler. Küçük oğulları 15 künge apis etilgen ve Simferopolniñ mahsus qabul etilgen yerde buluna, büyük ogulları evge qayttı.

Bu aqta insan aqları boyunca Qırım kontakt taqımınıñ teşkilâtçısı Abdureşit Cepparov haber etti.

«Tünevinki tintüvde añlaşılmay edi bu ballarğa «Hizb ut-Tahrir» (Rusiya Federatsıyasında yasaq etilgen – muar. qaydı) firqasına ait olğanları içün FSB, ya da vesiqalırı boyunca sıqıntılar olğanı içün FMS (Federal migratsion hızmeti – muar. qaydı) iddialarda bulundılar. Biz añlağanımızğa köre, bu FMSnen bağlı degil edi. Tintüv keçkende olardan diniy kitaplarnı aldılar, üçüni yollağan soñ ise, bu FMSnen bağlı olsa edi, olarnı yollamaz ediler dep añladıq», – qayd etti Cepparov.

«Qırım.Aqıqat» haber etkenine köre, apis etilgen insannı nasıl madde boyunca qapattılar belli degil, amma apis etilüvini Facebookta advokat Emil Kurbedinov da isbatladı.

Hatırlatamız, 9 avgust künü İslâm-Terekte (Kirovskoye) Umer Emiramzayevniñ evinde tintüv olıp keçti.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası