Şimdi haritada olmağan Qırım köyünde er sene yapılğan köydeşlerniñ körüşüvi olıp keçti

13.08.201717:34

Fotoda Zera Hacabadinova (Beşuy köyüne kezinti)

Yaz kelgeninen, gönül acayip bir şeyni bekleme duyğusınen tola. Bu duyğu saña raatlıq bermey. Elbette, bu sabırsızlıq nevbetteki tuvğan Beşuy köyündeki körüşüvnen bağlı… Bu duyğunı qolay şekilde añlatamazsıñ. Körüşüvge er yıl kelgen köydeşlerniñ aynı sımaları. 4-cı yıl biri-biriniñ artında toplanğanımız aynı alan. Bozulğan ve teren şekilde yuvulğan yol sebebinden köyge barmağa imkân olmay. Ne yazıq ki, onı da kimse tamir etmey. Bu sebepten şu tedbirde çoq insan iştirak etmey. Yol tamir etilmey, çünki anda yerleşken köy yoq desek olur. Yerli sakinler partizanlarnen işbirlik yapqanları içün almanlar onı yaqtılar. 50-ci senelerde ise, köyden qalğan şeylerni yer ile bir yaptılar. Şimdi Beşuy rayonı qorulğan yer olaraq ilân etilgen.

Bu sene körüşüvimiz, doğrusını aytsaq, fors-major alda olıp keçti. Bütün gece yağmur yağğan edi. Sabasına da «Zapadnaya» avtostantsıyasından çıqmadan evel, o, pek yağa edi. Biz epimiz körüşüvimizniñ başqa künge keçirmege kerek olacağını tüşündik. Amma bizim esas teşkilâtçımız Beşuyimizde çoqtan berli yaşağan, şimdi, ne yazıq aramızda olmağan, Aziz-ağa Erecepovnıñ oğlu Server Erecepov, sağolsun. O, yel bulutlarnı dağıtır ve biz planlaştırılğan körüşüvimizni keçirirmiz dep, epimizge ümüt berdi. Öyle de oldı. Yağmur bitti ve körüşüvimiz pek yahşı keçti!

Er sene olğanı kibi pilâv azırlaymız, etrafta acayip halq muzıkası yañğıray. Er şey keçken seneleri olğanı kibi. Amma er sefer bu duyğular yañı ola. Biz mında yaşağan baba-dedelerimizniñ hatırına sayğı, ürmet köstermege keldik… Qartlarğa köy, onıñ turmuşı aqqında berilgen sualler bitmey ve iç bir vaqıt usandırmay… Bu sefer de Beşuyde çoqtan berli yaşağan insanlarnen laf etilecek çoq şey bar edi. Bu Edem-ağa Topçi – Beşuyge kezintilerimizni başlağan insan. Bu Ziya-ağa Kazançuk, İlyas-ağa ve Dlâver-ağa Adamanovlar, Server-ağa Plaka, Zaur-ağa Bekirov. Olarnıñ çoq şey hatırlamağa ve operatornıñ kamerası ögünde añlatmağa imkânları bar.

Воспоминания Заура-агъа Бекирова

Zaur-ağa Bekirovnı hatıraları

Men ise, köydeşlerimizge er sene yapılğan körüşüvlerde faal iştirak etsinler dep, muracaata bulunmaq istedim! Arqañızğa çevirilip, bugün evde qalğan insanlarnıñ künü nasıl keçkenine baqıñız. Çoqusında, eminim, bu er vaqıttaki kibi cumaertesi künü olğandır. Men tek bugün yapılğan körüşüvni közde tutmayım. Bu sefer ava bizge pek te külmedi. Amma keçken seneleri olğanı kibi daa da yahşı yaz künleri ola. Yanıñızğa ballar ve torunlarıñıznı alıñız! Çünki bu güzel adetniñ devamcıları olar olmaq kerekler! Acayip Beşuyimizniñ turmuşını hatırlağan çoqtan berli mında yaşağan insanlar yıl yıldan azlaşqanı pek kederlidir. İşte, ayat öyledir. Bizim esas vazifemiz ise – genç nesil mında yaşağan qartlarımıznıñ bilgilerini birer-birer menimsesin ve kelecek nesillerge aqtarsın, çünki tuvğan yerlerini ziyaret etme ananesi saqlanmaq kerek.

Beşuy altımda

Özüm yüksekte

Uçurım başında turmaqtam!

Гульнар Халитова

Gulnar Halitova

Бешуйнынъ урлугълары

Сестры, Шазие, Шемсие, Зера

Şaziye, Şemsiye, Zera tata-qardaşlar

Author: Редакция Avdet

Avdet gazetası