Bugün, 14 avgust kunü, Yuqarı mahkeme, parlament ve Qırım ükümeti binaları yanında, bir qaç kün evelsi apis etilgen Server Karametovğa qol tutuv aktsıyası çerçevesinde, öz başına piketler olıp keçti. İştirakçiler yaqalandı.
Farqlı malümatlarğa kore yaqalanğanlar altı kişiden sekiz insanğa qadar edi.
Olarnıñ sırasında uquq qorçalayıcı Lilâ Gemeci de bar edi.
«Maña bir tanışım telefon açtı, onı yaqalap, Rayon İçki İşler İdaresine alıp ketecek ediler. Men, oña yardımğa aşıqtım. Onı qurtara bildik, evge kettı. Bu arada meni bir qartbabamız kördi ve onıñ menfaatını qorçamamı rica etti. Polis hadimlerı onı yibermey ediler. Neticede, qartbabamızğa protokol tizildi. Men onen beraber merkeziy İçki İşler İdaresine bardım, amma onen birlikte yaqalanğan oldım» ˗ dep, bildire Lilâ Gemeci.
Onıñ aytqanlarına kore, politsiya hadimleri piket iştirakçileriniñ areketlerinde «yaramay maqsad», tapmağa tırışalar.
Malümatlarğa kore, yaqalanğanlarınıñ menfaatını Cemıl Temişev qorçalayıcaq.
«Şimdilik, politsiya hadimleri boyle sualler bereler: bu nasıl piket edi, neler talap etile ve nenen memnüniyetsizlik bildirile. Er şeyni kamerağa çekmege tırışa ediler. «Añlaşılmağan qanunsızlıq» kibi taqdim etmege isteyler» ˗ dep, Gemeciniñ sözlerini ketire «Kırım.Aqıqat».
Bir qaç vaqıttan soñ belli olğanı kibi, Aqmescitniñ (Simferopol) Jeleznodorojnıy politsiya bölüginden üç insannı çıqardılar, olar sırasında: Seytumer Seytumerov, Aleksandr Dyaçkov, Selim Teyfukov. 64 yaşlı Yarikul Davlatovğa qarşı qabaatlama protokolı tizile (tedbir teşkilâtçısı tarafından mitingler, piketler ve başqa kütleviy toplantılar keçirme nizamını bozuv).
Avdetniñ haber etkenine kore, Aqmescitniñ (Simferopol) Jeleznodorojnıy mahkemesi 9 avgust künü qırımtatar milliy areketniñ faalini Server Karametovnı Rusiye Memuriy Qanun bozuvlar aqqında Kodeksniñ 19.3 maqalesiniñ 1-ci qısmı «Polis hadiminiñ qanuniy emirine boysunmaması» boyunca qabaatlı tanıp, 10 künge memuriy apiske mahküm etti.
Hatırlatamız, qart qırımtatar faaline qarşı eki memuriy protokol tizdiler. Olardan birisine köre, Rusiye Memuriy Qanun bozuvlar aqqında Kodeksniñ 20.2 maqalesi boyunca «bir insan keçirgen piketlerniñ tertibini bozğanı içün», ekincisi – «Polis hadiminiñ qanuniy emirine boysunmaması» içün. Ekincisine köre, Karametovnı qabaatlı tanıp, mahkeme 10 biñ ruble para cezasını berdi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
