Bir qaç kün evelsi apis etilgen Server Karametovğa qol tutıp, 14 avgust künü, Aqmescitte (Simferopol) öz başına piketke çıqqan ve politsiya tarafından yaqalanğan, faallerniñ bir qısmı azat etildi.
Jeleznodorojnıy polis bölüginden üç insannı çıqardılar, olar sırasında: Seytumer Seytumerov, Aleksandr Dyaçkov, Selim Teyfukov. Dörtünci aktsiya iştirakçisine – esli – başlı Yarikul Davlatovğa qarşı memuriy protokol tizile. Birazdan Aqmescitniñ Jeleznodorojnıy mahkemesine alıp ketilecegi beklenile.
Bu malümatnı Edem Semedlȃyev bildire, dep ayta «Kırım.Aqıqat».
«Üç gençni yiberdiler. Biri daa polis idaresinde.Oña qarşı Rusiye Memuriy Qanun bozuvlar aqqında Kodeksniñ 20.2 maqalesi boyunca «bir insan keçirgen piketlerniñ tertibini bozğanı içün» ˗ degen protokol tizildi. Bu qabaatlavğa kore, oña ya para cezası, ya da mecburiy işler mahküm etilecek. Mahkemeni bekleymiz», ˗ dep qayd etti Semedlȃev.
Advokatnıñ bildirgenine kore, Kiyevskiy polis bölüginde bulunğan piket iştirakçileriniñ de episini azat ettiler. Faaller içtimaiy ağlarda azat etilgen esli – başlı Osman Ablayevnen olğan vıdeonı paylaştılar. O. Ablayevni Rusiye İçki İşler Nazirliginiñ baş binası yanında yaqalağan edi.
Avdetniñ haber etkenine kore, Aqmescitniñ (Simferopol) Jeleznodorojnıy mahkemesi 9 avgust künü qırımtatar milliy areketniñ faalini Server Karametovnı Rusiye Memuriy Qanun bozuvlar aqqında Kodeksniñ 19.3 maqalesiniñ 1-ci qısmı «Polis hadiminiñ qanuniy emirine boysunmaması» boyunca qabaatlı tanıp, 10 künge memuriy apiske mahküm etti.
Hatırlatamız, qart qırımtatar faaline qarşı eki memuriy protokol tizdiler. Olardan birisine köre, Rusiye Memuriy Qanun bozuvlar aqqında Kodeksniñ 20.2 maqalesi boyunca «bir insan keçirgen piketlerniñ tertibini bozğanı içün», ekincisi – «Polis hadiminiñ qanuniy emirine boysunmaması» içün. Ekincisine köre, Karametovnı qabaatlı tanıp, mahkeme 10 biñ ruble para cezasını berdi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
