Aqmescitten vatandaşlarımıznıñ birinci gruppası acılıqqa yol aldı

16.08.201711:52

Qırım musulmanları, 64 kişi olaraq, 14 avgust künü Qırımdan, acılıq niyetinen Mekke ve Medinege yol aldılar.

Qırım müftiyatınıñ matbuat hizmeti haber bergenine köre, acılar Aqmescitten Krasnodarğa qadar avtobuslarnen ketecekler ve andan soñ Dubayğa uçacaqlar. Qoşma Arap Emirliklerinden ise, kene avtobuslarnen Medinege qadar kelecekler. Medinede muqaddes yerlerini ziyaret etken soñ, Mekkege yolğa çıqacaqlar.

Avgust ayınıñ soñuna qadar acılıqqa daa dört gruppa insan ketecegi tahmin etile. Bu sene Qırımdan muqaddes Mekke ve Medine şeerlerine 370 adam ketecek.

Haber etilgenine kore, yañı turist operatorı «AVM tur» acılıqqa niyetlengenlerge üç çeşit tur – programması teklif etti, birincisi: ekonom («Tutumlı») (fiyatı – 2200 dollar), komfort (2900 dollar) ve biznes programması (3600 dollar). Ondanda ğayrı QMDİ bir qaç insanğa bedava hac yapma imkȃnını berdi.

Acılıq –  islamnıñ beşinci şartı olaraq, çağına yetken, maddiy ve maneviy küçü olğan musulmannıñ yerine ketirecek borcudır. Arapçadan «Hac» sözü –yükseltilgen, tazim etilgen birisine  büyük istek ve niyetnen barmaq manasına kele.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

 

Author: Редакция Avdet

Avdet gazetası