Qarasuvbazar rayonınıñ Aq – Qaya (Belaya Skala) köyünde yerleşken «Kovboy» raatlanuv bazasında keçirilgen tintüv neticesinde, milliy areket faalleriniñ körüşüv merasimini teşkilâtçılarından biri olğan Bekir Umerovnı yaqaladılar.
Biraz vaqıttan soñra onı azat ettiler, amma belli olğanı kibi onı «büyük devlet resmiy şahısnı aqaretlev» inde qabaatlaylar.
Bekir Umerovnıñ sözlerine köre, o polis hadimlerinen laqırdı etken vaqtında, tintüvlernen bağlı tedbirler bitkenini beklep, soñ planlaştırılğan körüşüvni keçirmek teklifinde bulunğan edi. Lâkin, onıñ bu teşkerüvler ne qadar vaqıt alacaq sualine, oña «Eñ yahşı vaqıtlarğa qadar», — dep cevap berdiler.
«Men ise, dedim, sizlerde eñ yahşı vaqıtlar prezidentiñiz, ya da general sekretariñiz deñişse kele. Olar meni bu sözlerimi oyle aylandırdılar, sanki, men olarnıñ prezidentlerine ölüm tileyim. Protokol tizeceklerini ayttılar. Men olarnıñ qanunlarına binayen, bir şeyge imza atmaycağımı bildirdim. Olar daa keleceklerni ayttılar», — dep haber etti, yaqalanğan faal.
Qayd etmeli ki, Bekir Umerov öz vaqtında, 1987 senesi olıp keçken Moskvadaki vaqialarnıñ faal iştirakçisi edi. 1987 senesiniñ mayıs ayında o açlıq ilân etken edi, onıñ bu aktsiyası bir ay devam etti.
Hatırlatamız, bugün 20 avgustta, bir çoq silâlı polis hadimleri Qarasuvbazar rayonınıñ Aq – Qaya (Belaya Skala) köyünde yerleşken «Kovboy» raatlanuv bazasına kirişlerni qapattılar.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
