Bu künleri yüz bergen felâketten soñ, Sudaq civarında, özüniñ evinde 20 yaşlı genç elâk oldı. Avdetke bu haberni Qırım Fevqulade nazirliginde bildirdiler.
Genç oğlan açıq elektrik aqımına rast kelıp elâk oldı.
«Onıñ evini suv bastı… Suv ketken soñ, o eviniñ alt qatını cıyştırıp başladı. Işıqnı bergen soñ, suvutqıçnı yaqmağa ketti», — dep ayttı haber bergen menba.
Olıp keçken vaqia aqqında daa resmiy haber yoq.
Avdet haber etkeni kibi, 18 – 19 keçer gecesi, dağlardan tüşken sel mesken evlerni bastı, arabalarnı yüzüm bağlarına itep taşladı, bir qaç araba ise, tap deñizge çıqarıldı.
Fevqulȃde nazirliginiñ qurtarıcılari 76 insannı qurtardılar, olarnıñ içinde 23 bala bar edi. Üç köy ışıqsız qaldı.
Fevqulȃde vaziyetniñ aqibetlerinı yoq etmek içün qurtarıcılar bütün gece çalıştılar.
Salı (Gruşevka) – Sudaq yolunıñ 18 kilometrinde, Taraqtaş (Daçnoye) köyü yanında, taş yolğa sel tüşti, aqibette 15 araba yol çetlerine iterip taşlandı.
Olıp keçken vaqiyalardan soñ, yerli akimiyet bu vaziyetni şeerge has fevqulȃde al, dep tanımağa qarar aldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
