Qırımtatar milliy areket faaleriniñ, 1987 senesiniñ vaqıalarına otuz yıl toluv munasebeti ile körüşüv iştirakçileriniñ beyanatı

23.08.201723:40

1987 senesiniñ yazında, Sovetler Birleginiñ er bir regiyonından, qırımtatar halqınıñ yüzlernen delegatı Moskva şeerinde kütleviy narazılıq aktsiyaları keçirdiler.

Bu aktsiyalarnıñ sebebi, ükümet tarafından, qırımtatar halqınıñ çoq yıllıq talaplarını körmemezlikke urması olğandır. Talaplardan birincisi, bu qırımtatarlanıñ öz vatanına Qırımğa qaytma ve milliy devletçiligini tizme meselesi tura edi. Em de, psihiatrik hastahanelerinde ve apishanelerde tutuqlanğan qırımtatar milliy areket iştirakçilerini azat etmek edi.

Bu adiselerden ögüne, qırımtatar milliy areket faalerine qarşı, tıntuvler ve apis etmeler, işten boşatmalar ve oquv yurtlardan çıqarıp taşlamalar kibi, vaqyalar yüz bergen edi; Qırımğa köçüp kelmege ve yarımadada yaşamağa manialar qoyula edi, Vatanına avdet olğanlarnı ise,ğayırdan sürgünlikke oğrata ediler.

Otuz yıldan soñra qırımtatar halqı buña beñzer vaziyetke tüştü.

2014 senesi, bütün halqara qanunlarnı bozuvınen ve silâlı quvetler qullanuvınen Qırım, Rusiye Federatsiyasına kirsetildi. Qırımtatarlar – yarımadanıñ temel halqı olaraq buña qarşı ediler ve açıq – açığına Ukraina devletiniñ territirial birligine qol tutqan ediler.

Yarımadada meydanğa ketirilgen «Qırım Respublikası» (Qırım muhtar cumhuriyeti kibi) , qırımtatar halqınıñ aqlarını yerine ketirüvinde içte yardımcı degildir.

Kenede, qırımtatar halqınıñ temsilcileri, qırımtatar milliy areket faaleri, özleriniñ siyasiy noqta-i nazarlarını bildirgenleri içün, Rusiye Federatsiyasınıñ yolbaşçılarınen razı olmağanları içün polis hadimleri tarafından taqip etileler.

2016 senesi Qırım Yuqarı mahkemesi Qırımtatar Milliy Meclisiniñ faaliyetini yasaq etti.

Qırımdaki olğan içtimayi – siyasiy vaziyet qırımtatar halqını er taraflama sıqıştırıp, onıñ diskriminatsiyasına alıp bara.

Boyle siyasiy allarda qırımtatarlar özleriniñ aq – uquqlarını, halqara qanunlarğa tayanaraq tiklemege ıntılalar.

Yarımadamızda yaşağan başqa halqlarnıñ  menfaatlarını ürmet etkenimizni astını çızamız.

Qırımtatarlarnıñ, özleriniñ Vatanlarınen idere ete bilmeleri tamır halqlarnıñ aq – uquqlarını yerine ketire bilmek dep sayılır, bu milliy medeniyetniñ ve etnik hususiyetlerini ayaqta qalma usulıdır.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.