21 avgust künü, Yaltada prezident işleri böyünca idaresiniñ yanında Liliya Osmanova öz başına piket keçirdi.
Qadınnıñ elinde «Biz terrorist degilmiz» degen plakat bar edi.
«Qırım birdemligi» teşkilâtınıñ bildirgenine köre, Liliya Osmanova böyle numayışlerni devam etmege niyet ete, «çünki adaletsiz apis etilgen vatandaşlarına qol tutmasını özüniñ borcu dep saya».
«QırımAqıqat», «Qırım birdemligi» teşkilâtınıñ koordinatorı Dilâver Memetovnıñ sözlerine atıf etip, Osmanovanıñ aktsiyası yahşı keçti, onı yaqalamadılar, dep haber etti.
Hatırlatamız, Server Karametov Yuqarı mahkeme divarları tübünde öz başına keçirgen piketten soñ, Qırım boyu, qırımtatar faaline qol tutaraq, bir sıra öz başına piketler keçirildi.
Avdet haber etkeni kibi, Aqmescitniñ Jeleznodorojnıy mahkemesinde 9 avgust künü, qırımtatar milliy areketiniñ faaline Server Karametovğa, «polis hadimine boysunmağanı içün»10 kün memuriy apis cezasını berdiler, ondan evel ise, «öz başına piketler keçirüv qaydelerini bozuvda» qabaatlap, 10 biñ para cezasına maküm ettilgen edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
