Deñizge avtobus tüşüv neticesinde 18 adam elȃk oldı, olarnıñ içinde 28 yaşlı Server Ablȃzov da bar edi.
«Men şümdi laf etip olamayım, pek ağır, — dep ayta Serverniñ ağası Ervin. – Şaatlar ayttılar ki, avtobusnıñ çanaları çalışmay qaldı, onıñ içün avtobus deñizge tüştü. Qardaşım ise, endi bir seneden berli bu şirkette çalışa edi, er şeyni begene edi. Eñ esası, aylıqları, aylesini baqmağa yete edi, işten ise, o bir vaqıt qorqmay edi».
Server, çoq balalı Mustafa ve Dilȃra Ablȃzovlarnıñ aylesinde doğdı. Onıñ eki ağası bar – Ernest ve Ervin, kiçik qız qardaşı Sevil. Server ve onıñ aylesi aqqında, Voykovoda tek yahşı aytalar: işkir ve ürmetli adamlar. Elȃk olğan oğlannıñ qartbabası, Keriçte imam edi.
Ablȃzovlarnıñ aylesi Vatanlarına Tamandan qaytıp keldiler. Yaşap başladılar. Ana – babaları, bir qaç yıl evelsi Krasnodarğa qayttılar – anda çalışıp başladılar. Büyük oğlanları Qırımda qaldılar, Server ise, ana – babasınıñyanına köçti. Amma Voykovanı unutmay edi, ağaları ve qız qardaşına çoq kele edi.
Server Ablȃzovnı Vatanında defn ettiler.
«Bütün koynen cenaze qılacamız, — dedi yerli imam Dursun efendi. – E, o Tamanda yaşay ve çalışa edi, lȃkin mında onıñ qartbaba ve bitası kömülgen. O bizge tuvğan kibi!», dep bildire «КП-Кrıм».
Hatırlatamız, işçilerni alıp ketken avtobus, 25 avgust cuma künü, saba saat 8, sekiz metrlik yükseklikten deñizge tüştü. Avtobusta 51 adam bar edi. Qazanıñ esas sebepleri olaraq avtobusnıñ çanaları çalışmaması, dep bildirile. Avtobus toqtap olamaycağını añlağan soñ, adamlar, pencerelerni sındırıp çıqmağa ıntıldılar, amma çıqıp olamadılar. Neticede 18 adam elȃk oldı, 33 – zarar kördi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
