Sudaq memyriyetiniñ yañı başlığı olaraq Andrey Nekrasov tayin etildi. Ondan evel Nekrasov Sudaq memyriyet başlığınıñ muavini ve baş mimar vazifelerini eda ete edi.
Bu haberni Sudaq şeeriniñ internet saytında bildirdiler.
Andrey Nekrasov, Vladimir Serovnıñ yerine tayin etildi, Serov ise, öz sırasında Qaırımnıñ vitse – premyeri oldı.
Sudaq memyriyet başlığınıñ yerine dört adam iddia ete edi: bu Dmitriy Tkaçenko (şeer qurucılıq meseleleri bölüginiñ başlığı), Aleksandr Garniçev (iqtisadiy ilerileme bölüginiñ başı), Andrey Nekrasov ve Denis Mahov (Tverden namzet).
Neticede, konkurs komissiyası Andrey Nekrasov ve Dmitriy Tkaçenkolarnı belgiledi.
«Sudaq şeer şurasınıñ 678 nomerası altındaki qararğa binayen Sudaq memuriyetiniñ yañı başlığı olaraq, evel Sudaq memyriyet başlığınıñ muavini ve baş mimar vazifelerini eda etken, Andrey Nekrasov tayin etildi», — dep bildirile haberde.
Bilingenine köre, yañı Sudaq başlığı 46 yaşında, doğma Qarasuvbazarlı, Aqmescitte tasil alğan, evli, eki balası bar.
İyül ayında Sudaq deputatları sabıq memyriyet başlığı Vladimir Serovnıñ istifasını qabul ettiler. Birazda V. Serov Qaırımnıñ vitse – premyeri oldı.Vaqtınca Sudaq memyriyetiniñ başı olaraq Emirsali Ablâlimov tayin etilgen edi.
Avdet haber etkeni kibi, Sergey Aksönov Kefe (Feodosiya), Cankoy, İslâm Terek (Kirovskoye) ve Qurman (Krasnogvardeyskoye) şeer ve qasabalarınıñ başlıqlarını deñişecegi aqqında aytqan edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
