Belli 10 qırımtatarınıñ mektep çağları

03.09.201715:22

Bügün, biñlernen bizim balaçıqlarımız, birinci keresi raleler başına oturğanda, bizde qırımtatar meşurlarımıznıñ mektep çağlarınen bağlı foto ve hatıralarını köstermege istedik.

Seytcelil Halil, alıp barıcı, aktör, «Qırımda yaşa» şousınıñ iştirakçisi.

Fotoda – Seytcelil birinci sınıf talebesi, 1997 senesi, Qarasuvbazar (Belogorsk) rayonınıñ Ken – Togay (Litvinenkovo) köyüniñ mektebi.

Mektep çağında Seytcelil, polis hadimi olmğa arzu ete edi.

«Amma vaqıt keçkeninen, bizim devlette polis olmaq yahşı iş olmağanını añladım. Şimdi fermer olmağa arzu etem J» – dep şaqa ete aktör.

Mında, kelecekte alıp barıcı ve aktör olacaq Seytcelil, endi, Zuya milliy mektebiniñ talebesi. Bu mektepte oquğan senelerini, Seytcelil, böyle hatırlay:

«Mektepte oquğan yıllarım – bu vatanperverlik vaqıtı, o zamanları o qadar yahşı edi ki, mektepten ketmege istemey edim. Böyle mektepler çoq degil edi. Bu başta balalar bağçası yerleşken bina edi, mında er vaqıt nasıldır bir problemalar çıqa edi, ya qışta qızdırıcı sistema bozula, ya da kerekli qullanmalar yetişmey edi. Amma bu problemalar bizlerni birleştire edi. Büyükten – büyük teşekkürlerimizni, er daim bu mektepke yardım köstergen insanlarğa ayatmaq kerektir, bu – Remzi bey Şevqiyev, mektepniñ birinci müdiri Zera Ridvanovna, ana – babalar, faaller, ocalar…

Balalıqta, bu mektepni açmaq içün ne qadar küç kerek olğanı, tüşünmey edik. Şimdi ise, bu adamlar menim içün bir ibrettirler. Olar bizlerni aqıllı ve terbiyalı etip östürmege istediler, ve şu mektepniñ mezunlarına baqsaq, olar öz niyetlerine yettiler demege mümkündir».

Zair Akadırov, jurnalist, bloger.

Fotoda:Akadırov, Tacikistannıñ Duşanbe şeeriniñ 8 sanlı mektep talebesi.

«Menim eñ parlaq hatıralarımdan birileri, bu – saba pek yuquñ kelgen vaqıtta, tursatmaları, imtianlar mevsimi, medeniyet ve sport tedbirlerinde iştirk etüvlerim», – dep hatırlay, Akadırov.

Onıñ meraq etken mevzuları pek keñiş ve egerde o jurnalist olmağan olsa, ya belli yırcı, ya da futbolist olur edi.

«Er bir oquv basamağında, zenaat arzularım farqlı farqlı edi. Başlanğıç sınıflarında, bu aqta içte tüşünmey edim. Biraz büyügen soñ, sanaatnen meraqlanıp başladım. Meselȃ, yırcı, ya da muzıkant olmağa tüşüne edim. Soñ, sport dünyasınen meraqlanıp başladım. Futbolnı pek begene edim: Aqmescitteki «Lokomotiv» stadionında temrin etip başladım, statistika alıp bardım. Aynı şu vaqıtta,  jurnalistikanı begendim. Mektepten mezun olacaq vaqtıma ise, endi, jurnalist olacağımnı añladım», – dep, öz hatıralarınen paylaşa jurnalist.

Ediye Muslimova, cemaat faali, «Armançıq» mecmuasınıñ baş muarriri.

Fotoda Ediye hanım – 3 sınıf talebesi, 1973 sene, Yedi – Quyü (Leninskiy rayon), Kenegez (Krasnogorka) köyü.

«Biz daa yazılı degilmiz ((( Ve biz, ballar, bunıñ içün pek qasevetlene edik!», dep bildire Ediye hanım.

Cemil Temişev, adliyeci.

Fotoda Cemil Temişev, birinci sınıf talebesi, Rostov vilȃyetiniñ Solneçnıy köyü.

Başta adliyeci, tarihçi olmağa istey edi. Advokatlıq arzusı ise, mektepte olıp keçken bir adaltsiz olaydan soñ peyda oldı.

«Advokat olma istegim, bizim köyde bir soyımıznı öldürgen soñ peyda olğandır. Onı bir kötekte öldürdiler. Dört adam bir insannı urğan ediler. Olarnıñ sırasında bir poliste bar edi. Bu işte er şeyni qarıştırıp, qırımtatarını qabaatladılar. Öldürgenlerden, kimse apis olunmadı. Taqiqat neticesinde dediler, sanki qırımtatarı er kezni urğan, olar ise, qorçalanmağa mecbur olğanlar. O vaqıt bitam pek ağlağan edi ve içimmizde bir adliyeci olğan olsa, bu adaletsizlik olmaz edi, dep aytqan edi», – dep hatırlay Cemil.

Leylȃ Kadırova, «İ. Gasprinskiy adına qırımtatar kitaphanesiniñ» kitaphane işleri boyunca müdir muavini.

10 sınıf, Namangan, 1981 s.

Söz kelimi,fotodaki cevap bergen qızçıq, Leylȃ hanımnıñ egiz qardaşı.

Er kezge pek yahşı tanış olğan Leylȃ hanum Kadırova, mektepte oqumağa pek seve edi, belkimde onıñ içün o daa talebelik çağından kitaphanede çalışmağa arzu ete edi.

«Mektepni yahşı bitirdm. Tek bir dan dörtüm bar edi,  o da algebradan. Bütün fenlerni seve edim, amma edebiyat ve fizika derslerini episinden ziyade. Eger de bir de bir derske yahşı azırlanmağan olsam, bu menim içün balaban faciya ola edi. Ekim olmağa arzu ete edim, lȃkin kitaphaneci işini de begene edim. Kitaphanege bara edim, tez – tez kitap saylay edim, soñ ise  kitaphanecilerniñ artında taqıp ete edim. Aslında, mektep yıllarını çoq hatırlayım. Bu menim altın devrim edi! Mesüliyetlik! Vazifecilik! Dosluqlar… Men er şeyni hatırlayım ve güzel mektep senelerini içte unutmayım!», – dep asret ete Leylȃ hanım.

Refat Abducemil, tarihçi, filologiya ilimler namzeti, oca.

1 sınıf, 1995 sene, Qarasuvbazar (Belogorsk).

Mektepte Refat bey güzel oquy edi. Belki de, bu onıñ ayatına tesir etip, onı ilimnen oğraşmağa celp etti.

«Men ingliz tilini seve edim. Mektepteki parlaq hatıralarımdan biri, bu Qrım boylap kezintilerimiz edi. Meraqlı ve dülber yerlerge bara edik (Genuez qalesine, Qızıl – Qobağa, Yalta ayvanat bağçasına, Çehov muzyine ve ilȃhre)», – dep hatırlay Refat Abducemil.

Lenora Dülber, Sudaqta cemaat erbabı, qırımtatar faali.

1 sınıf, 1985, Çirçik şeeri.

Reşat Aliyev, fotograf.

Aqmescit rayonınıñ Çuyke (Çaykino) köyü, 5 sınıf talebesi.

Reşat Aliyev mektepte pek yahşı oquy edi, biologiya fenini begene edi, çeşit mektep olimpiadalarında iştirak ete edi. Arzusı, jurnalist olmaq edi.

«Dersler bitken soñ, deral evge qayta edim, babama yardım ete edim. Mektep sport taqımlarında iştirak ete edim. Futbol, voleybol, basketbjlda yeñişlerim bar edi», – dep aytıp bere Reşat Aliyev.

Elzara Seydametova, ressam.

3 sınıf, 2002 senesi, Cankoy.

İstidatlı ressam, balalıqtan resim yapmağa seve edi, amma hirurg, ya da taqiqatçı olmağa arzu ete edi.

Mustafa Degirmenci, qırımtatar faali, «26 fevral»işi bounca  qabatlanğanlardan biridir.

Fotoda Mustafa – Sudaq şeer litseyiniñ 6 sınıf talebesi.

Onıñ Mavile adlı qız qardaşı, ağası mektepte pek yahşı oquğanını hatırlay.

«3 sınıfta olğanda Mustafa Sudaq rayonından yekȃne talebe olaraq, oquşlarında yahşı neticeler köstergeni içün, Kiyevge, prezident naratına davet etilgen edi (Qırımdan tek 5 kişi davetli olıp, Mystafa da olarnıñ sırasında edi. Ocalar ale daa, Mustafanı, sakin, ,stidatlı ve aqıllı talebe kibi hatırlaylar», – dey Mavile Degirmenci.

Keçken sene qaramanlarımız aqqında bu yerde baqa bilesiñiz.

Belli alıp barıcı, «Lüdi T» KVN komandasınıñ iştirakçisi İsa İsmailov, mektep çağında çoban olmağa istey edi. Mektepte eñ begengen dersi biologiya edi.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

 

 

Author: Редакция Avdet

Avdet gazetası