Qırımlılar, Myanmada olıp keçken vaqıyalarğa öz narazılıqlarını bildirmege isteyler

05.09.201713:18

Advokat Cemil Temişev, Aqmescitte Myanmada olıp keçken vaqıyalar sebebinden miting keçirilmesine ariza yazacaq.

Onıñ haber etkenine köre, Qırım sakinleri, Myanmada olıp keçken vaqıyalarğa qarşı öz narazılıqlarını bildirip, Rusiye akimiyetine, çatışuv olğan yerge halqara gumanitar teşkilâtlarını kirmelerine yardım etmesine muracaat etecek olalar.

«Pek ümüt etem ki, bu keresi akimiyet, kelecekke baqar ve miting keçirilmesine maniyalar çıqarmaz, aksine, bizlerge yardımcı olur», – dep yazdı Temişev Facebookta.

Ondan da başqa, advokat, siyasetçilerge ve cemaat erbaplarına muracaat etip, miting keçirmelerine yardim etmelerini istedi.

«Çette qalmañız, prezidentke ve akimiyetke yapacaq muracaatlarımızda, bizlerge qol tutuñız», – dep celp etti advokat.

Sentâbr 3 künü, Çeçenistan başı Ramzan Kadırov, İnstagramda, Myanmada olıp keçken vaqiyalarnı genotsid, dep adlandırdı. Ve özüniñ noqta – i nazarını, Türkiye prezidenti Recep Erdoğannıñ noqta – i nazarına yaqın olğanını bildirdi. Çeçenistan başı, er kesni mitinglerge çıqmağa çağırdı.

Rusiye müftiler şurasınıñ başı Ravil Gaynutdin, 1 sentâbar künü, Bayram namazı vaqtında, Myanmada müsülmanlarını «zulumğa oğratılğanlarını» ve o adamlar içün dua etilmesi aqqında ayttı.

Rohinca – bu Myanmada kiçik bir etnik gruppadır. Bir millionğa yaqın Rohinca Bangladeş memleketinene olğan sıñırğa yaqın yaşaylar. Bu halqnıñ 90% müsülmandir. Birleşik Halqlar Teşkilâti haber etkenine köre, rohinca millet, dünyada eñ zulumğa oğratılğan halqlardan biridir. 2012 senesiniñ çatışmalarından soñha bu halqnıñ 120 biñden ziyadesi, öz vatanlarından ketmege mecbur oldılar. Olarğa vatandaşlıq bermeyler, tıbbıyet yardımıbda red eteler, memleket boyunca yürmeleri sıñırlı. Bu halq özü bildirgenine köre, olarnı müsülman olğanları içün zorbalıq çektüreler.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası