Aqmescitteki Trenev adına şeer bağçasında balaban tertip işleri başlandı.
Bu haberni Aqmescit Bala parkınıñ müdiri Aleksandr Şabanov bildirdi.
«Trenev adına paytaht parkında, çoq beklenilgen ve balaban tertip işleri kete», — dep bildirdi Bala parkınıñ müdiri.
Tertip işleri, kerekmegen ot ve ösümliklerniñ alıp taşlanmasından başladı. Bu kiyik otlar adamlar yürgen yolaqlarğa çıqıp ketken edi.
«Endi, bizim kiçik sakinlerimizde rolik ve samokatlarında kezinmege daa çoq yer peyda oldı», — dep haber etti Şabanov.
Şimdi işçiler tışarıda turğan mefruşatnı tamir eteler. Skemlelerniñ tahtalarını deñiştireler. Bunıñnen beraber ösümliklerni suvarma tertibatını da deñiştireler. Şardivanlarnıñ etrafındaki qoralamalarınıñ taşçıqlarını yañılatalar. İşçiler, eki bala meydançığını temizlediler, atlı qarıncalarını boyaladılar, bir danesini tamirge yolladılar. Fenerlerde qandillerini deñiştirdiler.
Hatırlatamız, Trenev adına şeer bağçasında, bundan evel yapılğan tamir işleri 2011 senesiniñ mart ayında başlağan edi. O vaqıtta park pek fena bir alda edi. Şardivanlar 1990 – ncı senelerinden çalışmay edi, klumbalar baqılmağan alda ediler. O vaqıtnıñ tamiratı bitken soñ, parkta 4 çeşmeden ibaret, renkli – muzıkalı şardivan peyda oldı. Tertip etilgen, Trenev adına şeer bağçasınıñ tantanalı açılışı 2 iyün 2012 senesi olıp keçken edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
