Mustafa Aliyev
Avgust ayınıñ soñ on kününde, Kezlevde endi adetiy olğan, on dörtünci qırımtatar ve türkiy halqlarnıñ medeniyetine bağışlanğan «Kezlev qapusı» festivali olıp keçti. Festival çerçevesinde «Aşıq oquvları» degen edebiy aqşamı, halq ünerleri ve tasviriy sanat sergisi, milliy «Kureş» ve icadiy taqımlarnıñ kontsertleri olıp keçti.
Bu sene, etnik festivalniñ çerçevesinde «Altın ses» vokal konkursı da olıp keçti. (birinci keresi bu konkurs 2013 senesi keçirilgen edi. O yılı gran – pri yerini Elina Sosnovskaya qazanğan edi, birinci mükȃfatlar – Ali Bekirov, Mavile Muhtarova ve Lilȃfruzğa berilgen edi. Bu keresi «Altın ses», yırcılarğa nisbeten öz talaplarını biraz deñiştirdi, ve konkurs iştirakçileriniñ yaşlarını sıñırsız etti. Böyleliknen, «profi» kategoriyasında QMPUnıñ vokal ve dirijörlıq kafedrasınıñ, Muzıka oquv yurtınıñ, Qırım devlet gumanitar universitetiniñ studentleri, ve Büyük Britaniya muzıka kolleciniñ studentı iştirak ettiler. 4 – yaş kategoriyasındaki yircılar, böyle konkurstaki nominatsiyalarda iştirak etmeleri mümkün edi: akademik yır, halq ve estrada yırları. Birinci kere vokal ansamblleri (duet, triyo, kvartet) degen bölük de kirsetildi. Reqabet küçlü edi, onıñ içün iştirakçilerniñ çıqışları yüksek seviyede keçti!
Konkursnıñ esas talaplarından biri, bu birinci turda türkiy tillerde yır icra etmek edi. Mında iştirakçiler qırımtatar, qazah, tatar, başqır, türk ve azeri tillerinde çıqışlar yaptılar. Ekinci turda ise, özleriniñ begengen türkülerini yırladılar. Konkursnıñ şartlarına binayen, yırcılarğa, fonogramma, plüs, sesni eşittirmegen bek – vokal qullanmağa yasaq edi.
Konkursnıñ jüri terkibine Novosibirsk filarmoniyasınıñ solisti Dalara Vorfolomeyeve, «Haytarma» ansambliniñ reberi Nariman Umerov ve jüri reisi, Qırım filarmoniyasınıñ solisti Gülsum Tamak kirgen ediler. Konkursnıñ maliyeviy yardımcıları İ. M. İppolitova (yımşaq oyuncaq işlep çıqara), O. A. Zaporojets («Zaporojets» firması) ve «Ornek» icadiy birleşmesi ediler, olarğa öz teşekkürlerimizni bildiremiz.
Gran – pri mükȃfatını, dülber bariton sayibi, Bağçasaraylı Mustafa Aliyev qazandı, o pek güzel qırımtatar halq yırını ve «Mister İks ariyasını» icra etti. Birinci mükȃfatlarını Seit – Mamut Useyinov (Otuz, Kefe), Anife Kuroş (İçki), Sevilȃ Abibullayeva (Canköy), Kseniya İvanova (Kezlev), Valeriya Karpova (Büyük Onlar) ve ansambl «Ebediyet» (Bağçasaray) qazanddılar. Ekinci yerni Ava Velilȃeva (Kezlev), Veronika Samatova (Büyük Onlar), Mavile Abkerimova (Canköy), Susanna Maksutova (Seyitler) ve ansambl «Filarmoniya», kence gruppa (Canköy) bölüştiler. Üçünci mükȃfat: Daniil Petrovskiy (Canköy), Karabayev Server (Büyük Onlar), Darya Susla (Kezlev), Marina Babayan (Aqmescit) ve «Garmoniya» duetine (QMPU) berildi. «Ümüt» mükȃfatı Darya Skripka ve Medine Kurtseyitovalarğa (Canköy) berildi. Konkursnıñ eñ yahşı sesi olarq – Kemal Bekirov (Saq) tanıldı. Qırımtatar yırına eñ yahşı interpritatsiya, dep Susanna Maksutova (üyken gruppa) ve Adile Çalbaş (kiçik gruppa), «Turnalar» yırı içün taqdirlendiler. «Altın ses» ve Almaniyadan «Altın mikrofon»nı Seit – Mamut Useyinov (Otuz, Kefe) aldı. Camalanıñ «Balıqçıyım» yırınen, eksklüziv diskinen, eñ mot ve kalorit yırcı Marina Babayan (Aqmescit) taqdirlendi. Konkurs iştirakçileriniñ ve olarnıñ ocaları diplomlar aldılar, laureatlar ise, hatıralıq ediyeler ve para mükȃfatlarınen taqdirlendiler.
Valeriya Karpova
Marina Babayan
Mamut Useyinov
Anife Kuroş
Kseniya İvanova
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
