«Milliy Firqa» reisiniñ evine ücüm etildi (Foto)

13.09.201711:37

12 sentâbr gecesi Aqmescitte (Simferopol) «Milliy Firqa» reisi Vasfi Abduraimovnıñ evine ücüm etildi. Belli olmağanlar evniñ içine «Molotov kokteylinen» şişeler taşladılar.

Bu adise Akmeçit mikrorayonıda gece saat üçlerde yüz berdi. Cinayetçiler evniñ içine yandırıcı qarışmanen üç şişe attılar, ondan yanğın başladı. Onı Vasfi Abduraimov özü, qadını ve oğlu söndürip başladılar.

Teşkilâtta haber etkenlerine köre, yanğın neticesinde bir pencere yandı ve kiriş qapı sındırıldı.

«Yandırıcı qarışmanen şişelerni qoranıñ öbür tarafından attılar. Bu şişelerniñ birisi bala odasına tüştü, anda 6 yaşna Reyana Abduraimova, Vasfi Abduraimovnıñ torunı, yuqlay edi. Şişe patladı, ondan pencereniñ camı sındı, moskit ağı ve pencere perdesi yanıp başladı», — dep ayttılar teşkilâtta.

«Milliy Firqa»da bildirgenlerine binayen, bu «terroristik eylem»dir. Ve tahmin etkenlerine köre, bu araket Vasfi Abduraimovnıñ alıp barğan, «qırımtatar halqınıñ reabelitatsiyası ve onıñ Rusiye Federatsiyasınıñ siyasiy, içtimayi ve iqtisadiy saalarına kirmesi» kibi siyasiy ve uquqqoruyci faaliyetinen bağlıdır.

Bugünki künde, yüz bergen adise boyunca teşkerüvler keçirile.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

 

 

Фото аватара

Автор: Редакция Avdet

Редакция AVDET