Qırımtatar faali Ahtem Çiygoznıñ advokatı Nikolay Polozov, mahkeme ükümine, eki apellâtsiya arizası yazğanını haber etti. Bu eki ariza – özüniñ ve qorçalaycısınıñ şikâyetleridır.
Avdet haber etkeni kibi, Qırımnıñ yuqarı mahkemesi Ahtem Çiygoznı, 2014 senesi fevral 26künü olıp keçken qarışıqlarda qabaatladı ve 8 yıl apiske maküm etti.
«Menim şikâyetim qısqa ve mahkeme üküminen (o daa yazılmadı, 14 sentâberge azır olacaq) tafsilâtlıca tanış olğan soñ, toldurılacaqtır. Amma Ahtem Çiygoznıñ şikâyetini men onıñ sözleriden yazıp aldım. Ahtem ağa, er şeyniñ teren manasını yazdı, iç yüridik inceliklerge kirmedi», — dep haber ete advokat. Ahtem Çiygoznıñ şikâyet arizasını Polozov içtimayi ağlarda kösterdi.
Daa haber olunğanı kibi, mahkeme ükümi, insan aqlarını qorçalağan Avropa mahkemesinde de, şikâyetke berilecek. Mahkeme ükümi ilân etilgende, Qırım mahkemesi Çiygoznı Ukraina vatandaşı, dep tanıdı.
Ahtem Çiygoznıñ siyasiy ayatından 15 kerçek
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
