Aqmescitte 15 sentȃbr künü, bulvar Frankoda, FSB idaresiniñ yanında yaqalanğan yedi faalni polis idaresinden azat ettiler.
FSB idresiniñ yanına faaller, bir kün evelsi qırsızlanğan ve pek urulğan Renat Paralamovğa qol tutmaq içün çıqqan ediler. Olar Qırım FSBsiniñ başı Viktor Palaginnen körüşmege istediler.
Bu haberni «QırımAqıqat» bildire.
Hatırlatamız, saba 13 sentȃbr künü, Seitler (Sovetskoye) qasabasında Renat Paralamovnıñ evinde tintüv olıp keçti. Bu tintüvni, polis hadimleri «teşkerüv ve taqiqat işleri», dep adlandırdılar. Advokat tahmin etkeni kibi, Paralamovnıñ evindeki «teşkerüv» onıñ diniy faaliyetinen bağlı ola bile. Adamlarnıñ aytqanlarına köre, betlerinde maskaları kiyilgen insanlar Paralamovnı belgisiz tarafqa alıp kettiler. Sentȃbrniñ 14 kündüzi o soylarınen bağlandı. Onı Aqmescitniñ avtovokzalında taptılar. Paralamovnıñ aytqanlarına köre, «belli olmağanlar onı çekiştirdiler, başına çuval kiysettiler, açıq toq tellerini tenine bastılar».
Faalleriniñ aytqanlarına köre, olardan añlatmalar aldılar, lȃkin bir qısım yaqalanğanlar, Rusiye konstitutsiyasınıñ 51 maddesini nazarda tutaraq, añlatmalar bermege red ettiler.
Yaqalanğanlarğa protokollar tizilmedi. Eki insandan parmaq izlerini ve DNK analizlerini almağa istediler, amma olar razı olmadılar.
Üç saat qadar, yaqalanğanlar polis idaresinde bulundılar. Sorğular vaqtında olarğa qaba ve sert davranmadılar, dey faaller.
Polis idaresinde daa bir yaqalanğan bulunmaqta, onıñ yanında advokat Cemil Temişev bar.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
