Aqmescitte yaş ressamlar öz icatlarını taqdim ettiler

29 avgust künü Franko adına Qırım universal kitaphanesinde, yaş qırımtatar ressamlarınıñ «Menim Qırımım» serlevalı sergileri olıp keçti. Bu sergide tasviriy sanatnıñ çeşit stil ve yönelişlerinde yasalğan resimler taqdim etildi.

Sergide öz işlerinen Elzara Seydametova, Cevair Ametova, Nayle Bekirova, Seyare Ametova, Elzara Yusufova, Muksum Şerfedinova, Nadiye Zidlâyeva iştirak ettiler. Özüniñ çıqışında «Alem Nisvan» adlı qırımtatar milliy merkeziniñ başı Lentara Halilova, qayd etti, qırımtatar qadın ressamları degende, er kes deral, belli ve namlı Zarema Trasinivanı köz ögüne ketire. Onıñ içün, tedbirniñ teşkilâtçıları, ya, yaş nesilimizde işler nasıl kete eken, degen sualnen meraqlandılar.

Ellbette, dünya öyle yaratılğan ki, er şey deñişe ve ilerley. Meselâ, güzel bir bahçe er vaqıt renkler çeşitliginen bizlerni quvandırır. Amma tecribeli birisi, bu güzellik içinde, daima yañı ve istidatlı fidannı tapar. Aynı böyle fikirler, yaş nesilimizniñ işlerini körgende aqlımızğa kele. Bizim gençler pek istidatlı, öz an – anelerini devam ettirici birileridir. Eñ evvelâ, olarnıñ işlerinde, abartmalıq ve epataj olmağanı quvandıra. Çünki çoq yaş ressamlarnıñ işlerinde aynı bu hususiyet bardır. Sergimizde taqdim etilgen işler, realistik, halqımıznıñ añına mensüp olğan usulda yapılğandır. E. Seydametovanıñ «Skvoz vremya» resimi müsbet teessuratlar qaldıra, resimde keçmiş ve kelecek birleşeler. N. Bekirovanıñ «Cezve s kofemolkoy» degen resimi ise, meraqlı olıp, milliy çizgilerimizni aks ettire. Seyircige ressam, qoqulı qave çekilme ve kerçek baqır cezvede pişirilme adetini hatırlata.

Yusufova da öz islerinen paylaştı. Onıñ resimlerinde Qırımnıñ, Tarhankutta yerleşken eñ güzel yerleri öz aksini tapqandır. Genç ressamlar gruppası mahsus Tarhankut yanlarına barıp, anda palatkalarda yaşadılar ve resimlerini yazdılar. Er kes Qırımnıñ yalı boyunı bile ve onen meraqlana, amma Elzara Yusufova, özüniñ «Bolşoy atleş», «Cangul», «Utro. Tarhankut» kibi eserlerinen çöl ve deñiz kibi, muhteşem birleşmesini kösterdi.

Bu serginiñ iştirakçileri bir çoq konkurslarda iştirak etip, ve ğalebeler qazandılar.

Foto: Enver Murat, İ. Franko adına kitaphanesi

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.