Gülnara İtaliyanıñ Emiliya – Romaniya vilâyetinde 14 yıldan berli yaşay. Menim Lütfiye bitam, onıñ anasınen daa sürgünlikniñ ilk seneleri, Samarqand vilâyetiniñ Bulunğur qasabasında yaşağanda dostlaşqan edi.
Gülnaranıñ babası Qırımda vefat etmege istey edi. Amma Qırımda vefat etmege izin yoq edi. Çünki qırımtatarı. Onıñ içün Geniçesk rayonınıñ Frunze köyünde vefat etti. Anda mümküm edi. Amma 1970 senesi Geniçesk rayonınıñ er yerinde ölmege mümkün edi, lâkin defn olunmağa mümkün degil edi. Çünki qırımtatarı. Onıñ içün Novoalakseyevkada defn etildi. Çünki…
Gülnara Zaparojyede institut bitirdi ve 30 yıl Geniçesk PMKsında müendis olaraq çalıştı.
Eki biñinci seneleriniñ başı. Gülnara Qırımğa köçmege istey. Mında endi, onıñ eki ağası ve eki tatası yaşay.
Geniçeskteki dairesini eki biñ dollarğa sattı ve qardaşına Kezlevge (Yevpatoriya) keldi. Biñ dollarına qardaşınıñ evine gaz keçirtti, onıñ oğlını mektepke azırladı ve qalğan parasına, 2003 senesi, aqça qazanmaq içün İtaliyağa ketme qararına keldi. 51 yaşında, İtaliyağa turist olaraq keldi ve qanunsız şekilde qaldı. 4 yıldan soñ, bu memelekette resmiy şekilde qalma izinini aldı.
O zaman ukrainlılar, cenüpke kete ediler, onıñ içün şimalde – Ferrarede – yerleşmege qolayca edi. 2008 senesi italiyalı Roberto ile «Nadiya» adlı ukrain assotsiyasını teşkil ete.
2005 – 2006 seneleri Roberto Qırımğa keldi. Pek begendi, özüne yaqın tanıdı. Ve katolik olmasam qırımtatarı olur edim, dedi.
Roberto ve Gülnara migrantlarğa yardım eteler. Olarda qanun boyunca izinleri olğan ve pek hasta ukrainliler yaşay. «Nadiya»da olarğa yaşamağa yer ve aşamağa aş bereler, italiyan tibbiyeti ise, mücizeler yarata. Sonki seneleri Afrika qaçaqlarına da yardım eteler. Grantlarnı şeer bere, onıñ içün er kesge yardım etmege kerekler.
Gülnara, Togo ve Kamerundan göñülli – studentlerni çalişmağa aldı. Studentler ayda 450 yevroğa, tolu olmağan kün çalışıp aydaycılıq yapalar, aşayit ketireler, merkezde yardım eteler.
65 yaşına kelip, Gülnara, öz italyancasını B1 seviyesine ketirdi. Bu sene B2 imtiyan bermege istey. Amma, daa kitap oqumağa ağır olğanını ayta.
Gülnara, münever ve pek sakin birisi. Anası tarafından o, Karaşay ve Bulgakov beyleri sülâlesinden. Gülnarada endi, İtalyan vatandaşlığına da aqqı bar. Yerli halq onı pek sevdi. Yerli milletke baqasıñda – addiy, amma italyan urbalarına kiyingen sudaqlı qırımtatarını köresiñ.
Gülnara ise, Kezlevge qaytmağa istey.
Osman Paşayev
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
