Alime Abdenanovağa Lenin rayonında qoyülğan abideni başqa yerge keçirmege isteyler

20.09.20176:57

Meşur qırımtatar istihbaratçısı, Rusiye qaramanı Alime Abdenanovağa Lenin rayonında qoyülğan, ve soñradan qırımtatar faalleriniñ küçleri ile tamir etilgen abideni başqa yerge keçirmege isteyler.

Abideni, «Tavrida» yol trassası yasalğan vaqıtta zararlanmaması içün ve soñradan oña adamlarğa barmağa qolaylı olsun, dep abide keçirilme komissiyası tizile.

Abide ne yerge keçirilecegi daa belli degil. Belki de onı Alime Abdenanovanıñ doğğan ve yaşağan qasabasına yaqınca keçirecekler.

Hatırlatamız, Alime Abdenanovanıñ hatırına tiklengen abide, Vatanlarına avdet olğan qırımtatarlarnıñ birinci tiklegen abidelerinden biri olğan edi. O zamanları böyle teşebüssnen qırımtatar milliy araketiniñ faali Reşat Ametov  çıqqan edi. Taşnı qoymaq içün, akimiyetniñ razılığı kerek edi. Amma faaller böyle razılıq alıp olamadılar. Olar özleri abideni azırlap, üstüne  Alime Abdenanovanıñ fotosını ve o aqqında bir qaç satır yazıp, yerleştirdiler. Abide fiyatı 1450 ruble olğan edi. Paralar «halq kassasından» ciyılğan edi. Taş boyunca işler bitken soñ, onı Sadıq Berberov, Smail Halilov ve Rustem Muslimov tiklenecek yerine ketirdiler.

Akimiyet tarafından taş qoyulmaması aqqında ihtar çıqarılğan edi. Amma buña baqmadan faaller, abideni gece qoyacaqları aqqında qarar aldılar. Ve 4 aprel gecesi 1988 senesi 70 – 80 qırımtatarı, 10 – 15 arabağa tolışıp, Alime Abdenanovağa abideni tiklediler.

Akimiyet ise, qoyulğan abideniqabul etmege mecbur oldı ve 9 mayıs 1988 senesi, onıñ tantanalı açılışını keçirdi.

25 yıl keçken soñ, kenede faaller toplaşıp, endi bayağı eskirgen abideni tamirini keçirgen ediler. Buña kene de halq paraları toplanılğan edi.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET