Qırım muzıkantları Enver Kamburovnıñ hatırasına bağışlanğan borazancılar festivalini ötkerecekler

21.09.201722:28

Qırımda Enver Kamburovnıñ hatırasına bağışlanğan, borazancı – muzıkantlar arasında konkurs – festival keçirecek oldılar.

Bu aqta  CANLI Radioniñ efirinde Kamburovnıñ dostları ve işdeşleri – Rustem Refatov ve Sefa ansamblniñ solistı Ablȃy Alȃdinov aytıp berdiler.

«Enver ağa bizim folklor muzıkamıznıñ ilerlemesine balaban isse qoşqandır. 70 – 80-nci seneleri Özbekistanda onıñ adı er tarafqa belli edi. O bizim kumirimiz edi. Onıñ balaban icadiy tecribesi, muzıkacı tasili, «Haytarma»da çalışma tecribesi bar edi, o bu şeylerniñ episini birleştirip, bizler içün bir nümüne olğandır», – dep ayttı Ablȃy Alȃdinov.

Rustem Refatovnıñ hatıralarına köre, Enver Kamburov, qırımtatar toyını milliy muzıka bayramına çevire edi.

«Kimse çette qalmay edi, er kes oynay edi. Biz bügün halq türküleri dep sayğan yırlarımıznı, çoqusını Enver ağa yazğan edi. Meselȃ, Ozenbaş qızları, Bağçasarayğa uzun yol», – dep hatırlay Refatov.

Hatırlatamız, belli qırımtatar muzıkantı, yırcı ve kompozitor Enver Kamburov 19 sentȃbr künü vefat etti.

Enver Kamburov – qırımtatar medeniyetini yüksek seviyege kotergen bir adam edi. Qırımtatarlarınıñ bir qaç nesil bu adamnıñ icadında ösip büyüdi. Yazıq ki, yaş nesil onıñ eserlerinen tanış degil, amma buña baqmadan, onıñ çoqusı türküleri halq arasında qaldı ve toy – ciyin merasimlerinde başqa muzıkantlar tarafından icra etile.Enver Kamburovnıñ eserleri halq eselerinen birleşip, olarnıñ bir qısmı olıp qalğandır. «Şu dağlarda seni körecegim, açacayım saña yüregim. Qara qaşlı Ozenbaş qızların severim, severim, severim» biz bellesek bu satırlarnı bilmegen yoqtırdır, amma bu yırnıñ müellifi Enver Kamburov olğanını az kim biledir. «Kamburov haytarması» ise, qırımtatar toylarınıñ ayırılmaz bir parçası olıp qalğandır.

Enver Kamburov 20 mart 1939 senesi, Büyük Ozenbaş köyünde doğdı. Cenk seneleri muzıka mektebine barmağa çare yoq edi, onıñ içün öz başına notalarnı ogrendi. Soñ ise, Taşkentte Uspenskiy adına konservatoriya yanında olğan muzıkal mektebini, kemaneci sınıfını bitirdi. Kemaneden birlikte, o başqa aletlerde çalmağa da ogrene edi. Böyleliknen onıñ esas çalğı aleti olaraq borazan belli oldı. On doquz yaşında o «Haytarma» ansambline çalışmağa kire ve Sabriye Erecepova, Selime Çelebiyeva, Fevzi Belâlov, Enver Şerfedinov, İlyas Bahşış, Ediye Topçı, Ablâmit Umerov, Kabul Seytveliyev kibi belli icatkârlarnen çalışa.  Enver Kamburov bir çoq eski ve qadimiy yırlarnı da icra etkendir.

İçtimaiy ağlarda FacebookVkontakteOdnoklassniki saifelerimizg, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası