6 avgust künü, Sudaq yanındaki Voron köyünde, köydeşler körüşüvi olıp keçti.
Böyle körüşüvlerni, köydeşler er yıl keçirmege tıraşalar. Bu keresi de, sıcaq avağa baqmadan, tedbirge pek çoq adam keldi.Voron (tercimelerden biri) – türkiy tillerden – vıran, yani «yer», yada «viran» — «viran etilgen yer» manasını añlata.
1926 senesiniñ 17 dekabrinde keçirilgen cedvelge aluv neticelerine köre, Voron köyünde 243 azbar olıp, olardan 242 köylü evleri edi. Bu evlerde 947 insan yaşay edi. Milletler olaraq, 943 adam qırımtatarı, 1 rus ve 1 urum bar eken. Qırımtatar mektebi çalışa edi.
Qırımtatarlarnı sürgün etken soñ, 1944 senesiniñ sentâbr ayında, mında Stavropol ve Krasnodardan 2469 qoranta ketirip yerleştirdiler, 1950-nci senelerniñ başında ise, ekinci dalğa olaraq, Ukrainanıñ çeşit yerlerinden adam ketirdiler.
Caminiñ eski binasında (çoqtan tamir işleri kerek), şimdiki vaqıtta, medeniyetler evi yerleşe. Bu binanıñ tavanı mozaykanen bezetilgen. Kim yapqanı belli degil, amma cenkten evel doğğanlar, onı daa balalıqtan hatırlağanlarını aytalar.
Cami yanında çeşme de bar, amma yazıq ki, o tek yağmurlar yağğanda çalışa. Çeşme üstündeki yazı pek meraqlı: 1925 senesi yasatışğan dep yazıla ve «Yüzünen köyge qarşı. Çeşme Krımvodhoz tarafından, köy sakinleriniñ paralarına yaptırılğandır», dep yazılğandır. Onıñ aşasında arap urfatınen yazılar da bar.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
