27 sentâbr künü Aqmescit rayon mahkemesi, qırımtatar milliy araketiniñ iştirakçisi İlmiy Umerovnı eki yılğa müstemleke – yaşamasına maküm etti
Eki yıl devamında, İlmiy Umerovğa halq ögünde ve kütleviy haber vastalarında çıqışlar yapmağa yasaqlandı.
Hatırlatamız, 20 sentâbr künü, prokuror İlmiy Umerovğa, 3,6 yıl şartlı apis cezasını ve üç yılğa halq ögünde çıqışlar yapmağa yasaqlanmasını istegen edi.
Mahkeme ükümi vaqtından erte ve İlmiy Umerovnıñ advokatları Mark Feygin ve Aleksandr Podrabineknıñ yoq oluvlarında başladı, dep haber ete «QırımAqiqat».
Umerovnıñ aytqanlarına köre, o ve onıñ advokatları, mahkeme ükümine itiraz kösterecekler. Egerde apellâtsiyalar yardım etmese, olar «halqara mahkemelerine muracaat etecekler».
«İnsan aqları boyunca Avropa mahkemesine baracaqmız. Ve men endi çoq kereler Gaaga aqqında ayttım. Anda Ukraina Rusiyege qarşı mahkeme keçirecek ve bu kiçik protsess, o balaban işniñ bir parçası olacaqtır», — dep qayd etti Umerov.
Foto: QırımAqıqat
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
