Keçken sene mayıs ayında, qavğa – şamatanen quvulğan N. A. Semaşko adına hastahaneniñ sabıq baş ekimini mahkeme etecekler.
Onı Rusiyeniñ cinaiy kodeksiniñ 285 maddesiniñ 1 qısımı, yani öz vazifelerinen suistimal etmesinde qabaatlaylar.
Taqiqatlar neticesinde, sabıq baş ekim 2015 – 2016 seneleri, kimer hadimlerge, qanunnı bozıp, qoşma maaşlar tölep, N. A. Semaşko adına hastahanesine 56 million rublege zarar ketirgeni billi oldı. Taqiqatçılar tarafından bu cinayet işi boyunca salmaqlı deliller tapıldı, — dep haber ettiler, Qırımda çalışqan RF Taqiqat komitetiniñ matbuat hızmetinde.
Polisler aytqanlarına köre, soñuna yetkizilgen cinayi iş, yaqın vaqıtlarda mahkemege yollanılacaq.
Hatırlatamız, Sergey Aksönov, 2016 senesiniñ mayıs ayında N. A. Semaşko adına hastahanesiniñ baş ekimini ve onıñ muavinlerini işten boşatmağa emir etti. Ondan evel belli olğan edi ki, hastahanede baş muasebeciniñ maaşı ayına, orta qarar 550 biñ rubleni teşkil ete edi.
Hastahaneniñ yañı baş ekimi olaraq Aleksandr Ostapenko tayinlendi. Ondan evel Ostapenko Qırımnıñ pulmanalogiya ve ftiziatriya merkezine yolbaşçılıq ete edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
