27 sentâbr künü, Qırımnıñ bir qaç rayonında, ışıqlar söndürildi. Buña sebep küçlü yel oldı.
Küçlü yel sebebinden 6-10 kV olğan doquz LEP işten çıqtı, olar mesken evlerge ve ofislerge elektrik ağını ketire ediler. Saat 15.00, 12 meskün yer Aqmescit, Lenin, Saq, Büyük Onlar, Bağçasaray ve Keriç rayonları qısmen ışıqsız qaldılar. «Krımenergo»nıñ matbuat hızmeti bildirgenine köre, eñ çoq ışıq söndürüvler boyunca şikâyetler Qırımnıñ paytahtı Aqmescitten ve Aqmescit rayonından keldi.
Bütün olğan zararlar tez – tez yoq etile, amma yel tınmağanı sebebinden yañı ağlar üzülivi meydanğa çıqa.
Aydaycılar, içtimayi ağlarda, yollarda çıqqan problemalar aqqında da aytalar.
Meselâ, Aqmescit – Ermeni Bazar trassası üstünden arabada ketmege bile qorqunçlı edi. Yol üstüne qum töküle ve tuman tüşe edi. Başqa yollarda da ketmege zor edi.
Soñ yigirmi dört saat içinde, Aqmescitte on beş terek yıqıldı, dep bildire «Krıminform», Aqmescit memuriyet başınıñ muavini Kirill Skorohodovnıñ sözlerine esaslanaraq.
Ondan evel, yarımadada 26 sentâbrden 29 sentâbrge qadar, furtunalı yel olacağı aqqında haber etken ediler.
Foto: «Avtopartnör Krım»
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
